IBaroka iqhubekile nokuphuza iChiefs inyongo
UMDLALI wasemuva kwiBaroka, uGoodman Mosele, exinwe kabi nguSamir Nurkovic, umkhonto ugwaze ekhaya nakuba kuyakhulunywa ukuthi iKaizer Chiefs ithole igoli emuva kokuvalelwa ebhodleleni kuka Nurkovic obesethathwa njengomsindisi wayo. Isithombe: Muzi Ntombela/BackpagePix
IBAROKA FC iqhubekile nokuphuza iKaizer Chiefs inyongo, iyidlalisa ngokulingana emdlalweni weDStv Premiership, obuseFNB Stadium izolo ntambama.
IBaroka ishaye amagoli amabili kulo mdlalo, kodwa yehluleka ukuthola amaphuzu aphelele. UThamsanqa Masiya nguyena obeke phambili izivakashi esiwombeni sesibili, kanti elokulinganisa leChiefs kube wumkhonto ogwaze ekhaya ngonyawo lukaGoodman Mosele oyisitobha seBakgaga Ba Mphahlele.
Irekhodi beliyiphika iChiefs ngaphambi kwalo mdlalo, kwazise la maqembu abesedlale imidlalo engu-11 kusuka ngo-2011. IBaroka inqobe imidlalo emine, iChiefs yanqoba emithathu, kwathi emine yaphela ngokudlala ngokulingana.
Ziya kulo mdlalo nje, ziyabhibha izinhliziyo kubalandeli beChiefs, kwazise iBakgaga Ba Mphahlele, yabaphuca iqatha emlonyeni ngesizini edlule, Amakhosi ashweba isicoco seligi ngomdlalo wokugcina wesizini.
IChiefs kwakufanele inqobe kwiBaroka ngomdlalo wokugcina wesizini, kodwa zehla izihlathi bedlala ngokulingana emdlalweni owaphela ngo-1-1.
Lokhu kwakusho ukuthi iMamelodi Sundowns ivikela isicoco seligi ngempumelelo kodwa ngeshwa kwaba ukuphela kwetoho kumqeqeshi weChiefs ngaleso sikhathi, u-Ernst Middendorp.
Umdlalo wayizolo uqale kuyiBaroka ecanasayo, igcina nebhola kakhulu. Ngomzuzu ka-15, isikhwishikhwishi seBaroka, uNhlanhla Mgaga, sithole ibhola singaphandle kwancane kwe-18. UMgaga udonse imbumbulu, edinge ukuthi unozinti weChiefs, uDaniel Akpeyi, alibambe alidedele ibhola lakhe kwazise belishisa.
Kubuye iqembu lasekhaya ngomzuzu ka-23, isitobha uReeve Frosler ecishe ebeka phambili iChiefs. ULebogang Manyama, ugobe ibhola elihle elisheshayo kwesokunxele, lafica uFrosler emi endaweni enhle kwesokudla kodwa ibhola lakhe laphuma eceleni kwamapali.
Alikho ithuba elicacile ngesiwombe sokuqala, ikakhulukazi kwiChiefs ebidlalela ekhaya nobekulindeleke ukuthi icindezele izivakashi.
Isiwombe sesibili siqale ngamandla, iBaroka yahamba phambili kungazelele muntu. Unozinti weBaroka, u-Oscarine Masuluke, ushaye ibhola elide elihlangane nomgadli u-Evidence Makgopa, olidlulise ngekhanda lahlangana noMasiya oshaye elihle ibhola laphuma phakathi kwemilenze ka-Akpeyi.
Ukuhamba phambili kweBaroka bekusho ukuthi uGavin Hunt nethimba lakhe kumele bashintshe ukwenza. Libuyile ngamandla iKhosi lifuna elokulinganisa, uFrosler ubewuhlupho kwesokudla kwizivakashi.
Ngomzuzu ka-76, ubuyile uFrosler, wakhombisa ubuhlakani egoqa izitobha zeBaroka, wagoba umshoshaphansi. Ngeshwa likaMosele, ibhola lihlangane nonyawo lwakhe, umkhonto wagwaza ekhaya. Emuva kwaleli goli, ibisicanasa iChiefs, imaka imakile iBaroka.
IBaroka, iqalile yakhombisa ukuthi isilwela iphuzu kulo mdlalo. Ukuzama ukuchitha isikhathi nokupaka ibhasi bese kuyizinto eyenziwa yizivakashi, ngenxa yokusindwa wumdlalo.
Amakhosi azobhekana nabakhaya i-Orlando Pirates ngoMgqibelo emdlalweni obhekwe ngabomvu.
Komunye umdlalo obuse-Orlando Stadium, izolo, iPirates idlale ngokulingana neTS Galaxy zimbana ngo-1-1.