IBarcelona noMessi nengcindezi kwiLa Liga

IQONGA umdlalo nomdlalo ingcindezi kwiBarcelona noLionel Messi emuva kokuqala ngegiya elihlehlayo isizini ka-2020/2021 nokuyibeka endaweni ka-12 ekubeni isidlale imidlalo eyisithupha.

Akukuhle neze kwiBarcelona edlala neReal Betis kaManuel Pellegrini eCamp Nou namuhla ngo-5 kwazise kule midlalo eyisithupha isathathe amaphuzu ayisishiyagalombili kuphela.

Sekunemidlalo emine ilandelana kwiLa Liga inganqobi iBarcelona.

Selokhu yagcina ukuqala kabi ngendlela ethi ayifane nale ngo-2002/2003 nokuyisizini abagcine kuyo beqede endaweni yesithupha.

Bavele kuyimanje basele ngamaphuzu ayisishiyagalolunye kwiReal Sociedad eseqhulwini yize besele nangemidlalo emibili.

Basele ngamaphuzu ayisishiyagalombili kwiReal Madrid, evikela isicoco nesanda kubavathela ngo 3-0.

Ingcindezi ayihleli kuphela emahlombe omqeqeshi omusha, uRonald Koeman kodwa ikapakele nakuMessi kwazise selokhu iqalile akakalishayi igoli elikhandwe kahle kudlalwa kungesiyo iphenathi.

Empeleni unegoli elilodwa le ligi kule sizini, nalo kuyiphenathi. Uma uyibeka eceleni isizini edlule eqale elimele, ngokokuqala kusuka ngo-2005 ukuthi adonse kanzima ngalolu hlobo. Ngaleso sikhathi eneminyaka engu-18 esangena ebholeni elikhulu.

Abadlali abakule minyaka njengamanje ngu-Ansu Fati ohlanganise u-18 ngeledlule noPedri nabayithemba lekusasa elingcono.

Nangaphandle kwenkundla iBarcelona inezinkinga kwazise kusanda kusula nobengumengameli wayo, uJosep Maria Bartomeu, okubhekwe sivalwe ngoDisemba isikhala sakhe.

“Iqembu njengamanje liyile nto eliyiyo,” kusho uPique. “Liphezu kwezinguquko ezimbalwa futhi ezimqoka. Besidinga ukuphendula amatafula. Sekunesikhathi kucaca ukuthi siyehla futhi minyaka yonke izinto bezilokhu ziba zimbi.”