ICAS ichithe iChiefs kwelokusayinisa abadlali
Amakhosi azithola ekulolu bishi ngenxa yokulahlwa yicala yiFifa ngokusayinisa ngokungefanele umdlali waseMadagascar u-Andriamirado “Dax” Andrianamimanana. Isithombe: Samuel Shivambu/BackpagePix
IKHALE ngaphansi iKaizer Chiefs emizamweni yayo yokuthi kuguqulwe isigwebo sokungasayinisi abadlali abasha amawindi amabili.
IChiefs ibidlulisele kwiCourt of Arbitration for Sport (CAS) lesi sigwebo ngenhloso yokuthi siguqulwe. Isikhalo sayo salalelwa ekuqaleni kukaSepthemba njengoba isinqumo siphume ngoLwesibili ntambama.
Amakhosi yiwona aqinisekise ekhasini lawo lika-twitter ukuthi sichithiwe isicelo sawo.
“Isigungu seCourt of Arbitration for Sport isichithile isicelo seKaizer Chiefs saqinisekisa isinqumo seDRC yeFifa. Lokhu kuchaza ukuthi iqembu ngeke likwazi ukubhalisa abadlali kumawindi amabili elandelana,” kusho isitatimende esifushane esifakwe ekhasini layo le-twitter elithi-@Kaizer Chiefs.
Isitatimende esigcwele ngesinqumo seCAS siyatholakala kwi-website yayo ku-www.tas-cas.org.
Lokhu kusho ukuthi umqeqeshi uGavin Hunt uzoqhubeka ngokuchibiyela ngabadlali abancane kwiChiefs kuze kuba kuphela isigwebo. Iwindi lokuqala lePremier Soccer League liphakathi kanti lizovalwa ngoNovemba 17.
Elesebili lizokuba ngoJanuwari.
Amakhosi azithola ekulolu bishi ngenxa yokulahlwa yicala yiFifa ngokusayinisa ngokungefanele umdlali waseMadagascar u-Andriamirado “Dax” Andrianamimanana. Kwathiwa lo mdlali wasayina neChiefs ekubeni esanenkontileka neqembu langakubo iFosa Juniors. IFifa yagweba iChiefs amasizini amabili ingasayinisi, yayilalela nokuthi ikhokhele iqembu imali elinganiselwa ku-R640 000. Umdlali wagwetshwa ukuthi angadlali izinyanga ezine. UDax obesedlalela iBlack Leopards usasiqeda esakhe isigwebo.