Uzithwese umthwalo wamagoli (30)
UKERMIT Erasmus weMamelodi Sundowns unesifiso sokwephula irekhodi lamagoli kwiPremier Soccer League Isithombe: Samuel Shivambu/BackpagePix
USEZITHWESE umthwalo onzima umgadli weMamelodi Sundowns uKermit Erasmus, eveza isifiso sokuphula irekhodi ngokushaya amagoli awu-30 kule sizini.
U-Erasmus ukusho lokhu kwi-website yeSundowns ngemuva kokubonakala okokuqala, edlubhe imibala yaleli qembu ngempelasonto edlule.
Ungene esuka ebhentshini ngesikhathi amaBrazilians ebhekene neBloemfontein Celtic emdlalweni we-quarterfinal yeMTN 8. I-Downs iguqe ngo 1-0.
Kubhekwe ukuthi ivuke izithintithe kusasa, uma isidlala neKaizer Chiefs kowokuqala weDStv Premiership, eFNB Stadium ngo-3.30 ntambama.
U-Erasmus ujoyine iSundowns njengoba kuvulwe iwindi esuka kwiCape Town City aqede kuyona ewumdlali onamagoli amaningi, ngokuvalela awu-14 kwiligi ngesizini edlule.
Uthe okumlethe kuleli qembu lasePitoli yintshisekelo yokunqoba izindebe. Ngesizini edlule ezaseChloorkop ziphakamise izindebe ezintathu, eyeligi, iTelkom Knockout neNedbank Cup.
“Okunye ngifuna ukwephula irekhodi lokuba umgadli ovelele ngokuzama ukushaya amagoli awu-30,” usho kanje kwi-website yeqembu izolo.
“Baningi abazocabanga ukuthi ngiyahlomeka kodwa ngabadlali enginabo lapha kungenzeka. Uma ubheka ukhilimu wabadlali abakhona njengoKK (Hlompho Kekana), (Andile) Jali, Mshishi (Themba Zwane), George (Maluleka) no(Gaston) Sirino, ngikholwa wukuthi amagoli awu-20 kuya ku-30 yinto engenzeka. Inqobo uma ngingeke ngilimale.”
U-Erasmus ukhuluma kanjena sekuyiminyaka kubhekwe umdlali oyophula irekhodi elabekwa uCollins Mbesuma esadlalela iKaizer Chiefs, ngesizini ka-2004/2205. Lo mgadli odabuka eZambia wavalela phakathi amagoli awu-25 emidlalweni yeligi.
Kusukela lapho kuthathe amasizini ayisikhombisa ukuthi kubekhona umgadli ofinyelela kumagoli awu-20. Lowo uSiyabonga Nomvethe, owashaya lesibalo ngesizini ka-2011/2012 ewumdlali weMoroka Swallows.
Akekho umdlali oseke washaya amagoli awu-30 kwiligi selokhu kwabakhona iPremier Soccer League. Omunye oseke washaya awu-20, uWilfred Mugeyi owavalela phakathi awu-22 edlalela iBush Bucs ngo-1996/97. Ngesizini ka-1998/1999 uPollen Ndlanya washaya awu-21 kwiKaizer Chiefs.
Ngesizini edlule abahambe phambili ngamagoli kube uPeter Shalulile (Highlands Park) noGabadinho Mhango (Orlando Pirates) abashaye awu-16 ngamunye.