Ezemidlalo Ibhola

Isibabuli seMaritzburg sibeke ithemba kozakwabo

Nhlanhla Sithole|Published

Mxolisi Kunene of Maritzburg United tackled by Khuliso Mudau of Black Leopards during the Absa Premiership 2019/20 match between Black Leopards and Maritzburg United at the FNB Stadium, Johannesburg on the 16 August 2020 ©Muzi Ntombela/BackpagePix

ISIKHWISHIKHWISHI somdlali esigijima phambili ngawesokunxele kwiMaritzburg United, uMxolisi “Jomo’’ Kunene, sithi siyabethemba ozakwabo nakuba sona singekho ngenxa yokulimala edolweni ukuthi bazoqhubaka nokuyibamba ishisa kule midlalo esele ngaphambi kokuthi kusongwe isizini ka-2019/20.

Umdlalo olandelayo nonzima abafana baseMphithi bazowudlala ne-Orlando Pirates eLucas Moripe Stadium, e-Atteridgeville ngoLwesithathu ngo-6 ntambama.

Okwenza lo mdlalo udle ngokukhanga wukuthi womabili la maqembu azokube elwela ukuvikela isithunzi sawo ngenxa yokuthi awekho embangweni wesicoco kodwa azokube efuna ukuqeda endaweni ehloniphekle kwi-log.

I-The Team of Choice ihlezi endaweni yesithupha ngamaphuzu awu-41 ngemuva kweZimnyama ezikweyesihlanu eziqoqe awu-43.

Okwenza uKunene (28), odabuka eMooi Farm, eNyanyadu, eDannhauser, aqine idolo ngozakwabo yindlela yokuzethemba efike yatshalwa umqeqeshi wabo * -Eric Tinkler.

“Umqeqeshi * -Eric (Tinkler) usenze umehluko omkhulu lapha eqenjini selokhu afika.

“Into afike wayenza kubadlali ufake umoya wokuzwana, ukuzethemba nokuphikelela ngaso sonke isikhathi noma ngabe sibhekene naliphi iqembu.

“Sisebenza ngomoya wobunye ngaso sonke isikhathi. Asinayo le nto yokuthi ubani uyisihlabani noma ungcono kunabanye eqenjini,” kuchaza uKunene.

Uphinde waphawula ngokwakuyiphupho labo lokunqoba indebe yeTelkom Knockout eyagcine iqukulwe yiMamelodi Sundowns.

“Nakuba-ke sigcine singasayiwinanga kodwa esesizibophezele ngakho njengamanje ukulwela ukuqeda le sizini sikwiTop 8,’’ kusho uKunene.

UKunene uphinde waveza ukulahlekelwa kwakhe yithemba ngesikhathi iMoroka Swallows eyafeza iphupho lakhe lokudlala esigabeni esikhulu isiphinde idliwa yizembe.

Ngaleso sikhathi yayidlala kwiNational First Division (Glad Africa Championship) ngesizini ka-2015/2016.

Izinyoni zehlela esigabeni i-ABC Motsepe ekupheleni kwaleyo sizini okuyisigaba abedlala kusona esekwiDurban Worriors.

Kwaba yilapho-ke uKunene afikelwa ngumuzwa wokuphelelwa yithemba ebholeni.

Lokhu kwakwenziwa ukuzibona esebuyela esigabeni i-ABC Motsepe League ayesedlale kuso amasizini amaningi.

Ngenhlanhla wasayiniswa yiBaroka FC maphakathi nesizini ka-2016/17 nokwenza walibamba ngazo zombili ithuba eliyingqayizivele ayeselinikwe yiBakgaga lokuphinde agijime esigabeni sePremiership.

Waphinde wabamba iqhaza ngenkathi leli qembu livika izembe ngasekupheleni kwaleyo sizini nalapho ashaya igoli bedlala neKaizer Chiefs emuva kokugadulisa abadlali bayo waze wahlanganisa i-Itumeleng Khune namapali, eshaya igoli lokulinganisa.

Lelo kwakuyigoli likaKunene lokuqala esigabeni sePremiership, nelamhlabanisa ngomklomelo wengcwenga yegoli lenyanga ka-Ephreli ngaleyo sizini.

Emuva kokusinda kweBaroka ezembeni, ngesizini elandelayo lo mdlali wabe esebhekisa amabombo kwaNdongazibomvu (eMgungundlovu) eseyojoyina iTeam of Choice asephenduke isethenjwa sayo muva nje.