Uqweqwe olungu-Igesund lukhonjwa kwiTTM

LUKHONJWA kwi-Tshakhuma Tsha Madzivhandila uqweqwe lomqeqeshi, uGordon Igesund ozakhele udumo edla izicoco zeligi emaqenjini ehlukene.

ITshakhuma ithenge isitifiketi seBidvest Wits sokugijima kwi-Absa Premiership kusukela ngesizini ezayo. Leli qembu liyibamba kwiGladAfrica Championship.

Isolezwe lihabule ngomthombo walo othembekile ukuthi u-Igesund ufunwa uthuli yiTshakhuma.

“Igama lika-Igesund like laqhamuka kweminye imihlangano yeTshakhuma. Bakhona nabanye abaqeqesha amaqembu athize engingeke ngibadalule ngenxa yokuthi kukhona amaqembu abasasebenza kuwona,” kusho umthombo.

Kwabanye abaqeqeshi abagaqelwe yiTshakhuma kukhona negama lika-Owen Da Gama.

“Leli qembu lifuna ukufika kuzwakale esigabeni esiphezulu. Yingakho lisayinise u-Oupa Manyisa noJoseph Moloangane zisuke nje, “ kuqhuba umthombo.

Ethintwa u-Igesund ngoMsombuluko uphikile ukuthi uxoxa neTshakhuma.

“Okwamanje alikho iqembu engixoxa nalo. Ngike ngahlaba ikhefu lezinyanga ezingu-18 ngihlanganisa indaba yenkulisa yami. Manje isihlangene. Sengingabuyela ekuqeqesheni ezingeni eliphezulu kodwa abekho engixoxa nabo okwamanje,” kubeka u-Igesund.

ITshakhuma ikubeke kwacaca ukuthi ayikwazi ukukhokhela uGavin Hunt ngoba umba eqolo.

U-Igesund uzakhele udumo emaqenjini afana neManning Rangers, Orlando Pirates, Santos neMamelodi Sundowns okungamaqembu adla nawo izicoco zeligi. Uke wayibamba nakwiBafana Bafana.

Imizamo yokuthola usihlalo weTshakhuma ayizange iphumelele kwazise ucingo lwakhe belukhala lungabanjwa.

ITshakhuma izofudukela eLimpopo ngemuva kokuthenga iWits. Izilomo zeWits ezifana noThulani Hlatshwayo, Deon Hotto noBrandon Petersen aziyi eLimpopo ngoba sezivumelene nePirates.