Zinkani zababili kowesicoco seligi

INTAKA ibekelwe amazolo kubathandi bakanobhutshuzwayo njengoba ishaya ibuya imidlalo yokuqedela isizini ka-2019/2020 ye-Absa Premership, umbango wayo oshisa phansi phakathi kwabaqeqeshi abafana ncamashi ngokuzazi nokuzethemba.

Laba baqeqeshi ngu-Ernst “Mazinyo” Middendorp weKaizer Chiefs abaningi abathi uhleli ngesinqe esisodwa esicongweni, noPitso “Jingles” Mosimane weMamelodi Sundowns. Womabili amaqembu agubha iminyaka engu-50 kule sizini.

UMiddendorp uzihola phambili ngamaphuzu angu-48 emidllweni engu-22 kanti uMosimane uphefumulela emhlane ngawu-44 kodwa usele ngomdlalo owodwa kuMakhosi.

Bobabili bafana ncamashi uma kukhulunywa ngokuzethemba, nokuyinto efakazelwa yindlela abaphendula ngayo njalo uma bebuzwa ngombango wesicoco.

NgokukaMosimane, iChiefs ikulo mbango nje, ingenxa yokusizwa amaphutha amaningi enziwa onondweba kodwa uma bedlalisa yona kuphela.

Ngaphezulu kwalokhu, uMosimane akaliyeki ithuba lokuneka iChiefs ngokungabinazo izifiso ezinkulu kwazise ihlale ikhombisa izimpawu zokungayinaki imiqhudelwano yase-Afrika.

Banomlando wokuxabana bukhoma esithangamini nabezindaba njengoba kwenzeke kwiShell Helix Cup enqotshwe iChiefs. UMosimane wabhuqa iChiefs ngokuthi isebenzise isikimu sayo esiphelele ekubeni yena edlalise abadlali abangalijwayele ijezi.

Ukuklwebhana kukaMiddendorp noMosimane kuzoqala phansi kwazise iDowns inethuba lokuvala igebe, kube iphuzu elilodwa eliyihlukanisa neChiefs. Kusemqoka futhi ukukhumbula ukuthi iSundowns isazolithola ithuba lokuzibambela kwiChiefs.

Zombili izimbangi zisidinga ngendlela engachazeki isicoco sakule sizini. UMiddendorp usizwa ngendaba kusukela afika kuleli eminyakeni engu-16 edlule.

Iyisishiyagalombili imidlalo esalele uMiddendorp ukuthi aqede leli bhadi kodwa akubukeki uMosimane ezomenzela kube lula.

Unezakhe izizathu zokusidinga lesi sicoco uMosimane njengoba ebambene noGavin Hunt, Ted Dumitru noGordon Igesund emlandweni wokuba ngumpetha amahlandla amane.

Ukudla lesi sicoco kuzokwenza uMosimane abe umqeqeshi ovelele eNingizimu Afrika. Kungaqopheka omunye umlando kwazise kungaba ngokwesithathu kulandelana, iSundowns ivalela inkomishi yeligi ekhabetheni layo.

ISuperSport United kuphela eke yadla isicoco amahlandla amathathu kulandelana kusukela yasungulwa iPSL ngakho uMosimane uzokulwela ukufaka iSundowns kulo mlando. Uma iSundowns isidla lesi sicoco kuzobe kungokuka-10 emlandweni.

Njengoba iTelkom Knockout isivele isekhabetheni kanti nakwiNedbank Cup kubukeka kusahamba kahle (ngaphandle uma iBidvest Wits ukuguqula lokhu), ukudla iligi kungehla kahle kubalandeli beSundowns.

Uma ubheka ukuthi iChiefs ayifake lutho ekhabetheni eminyakeni emihlanu, le midlalo esele izomvivinya uMiddendorp.

Imi kanje imidlalo yokuqala yokubuya kwe-Absa Premiership:

11 Agasti: Mamelodi Sundowns v Orlando Pirates (6pm, Dobsonville Stadium).

12 Agasti: Kaizer Chiefs v Bidvest Wits (6pm, Orlando Stadium).

14 Agasti: Chippa United v Cape Town City (3.30pm, Orlando Stadium); Highlands Park v Mamelodi Sundowns (6pm, Dobsonville Stadium).

15 Agasti: AmaZulu v Baroka ((1.30pm, Lucas Moripe Stadium); Stellenbosch FC v Golden Arrows (1.30pm, Tuks Stadium); Polokwane City v Kaizer Chiefs (3.30pm, Loftus Versfeld); Orlando Pirates v Bidvest Wits (6pm, Emirates Airlines Park).

16 Agasti: Black Leopards v Maritzburg United (3.30pm, FNB Stadium); SuperSport United v Bloemfontein Celtic (6pm, Bidvest Stadium).