Ezemidlalo Ibhola

Intshisekelo yomlando wokuhlwitha izicoco ezintathu kuKekana

Minenhle Mkhize|Published

UHLOMPHO Kekana weMamelodi Sundowns olangazelela ukuqukula izicoco ezintathu kule sizini

UKAPUTENI weMamelodi Sundowns ungomunye wabadlali abahamba phambili ngezicoco kuleli kodwa yize kunjalo isamubusa intshisekelo yokuphumelela njengoba elobizela ukuhola iqembu lakhe liphakamise indebe ka-10 ye-Absa Premiership.

Njengoba kubuya imidlalo yePremier Soccer League (PSL) kule mpelasonto, uKekana ufuna ukufana noMoses aholele iqembu lakhe ezweni lesithembiso. Kulokhu banethuba lokunqoba izicoco ezintathu kwisizini eyodwa. I-Orlando Pirates yilona iqembu eselike lakwenza kabili lokhu emlandweni wePSL.

ISundowns isivele ingompetha beTelkom Knockout. Inethuba lokulwela isicoco seligi njengoba isendaweni yesibili kwi-log ye-Absa Premiership. Ihlukaniswe amaphuzu amane neKaizer Chiefs eseqhulwini ngawu-48.

NgoMgqibelo amaBrazilians azolwela ukuzibekisela indawo kowamanqamu eNedbank Cup uma esethuthana neBidvest Wits e-Orlando Stadium ngo-7 ebusuku.

“Lesi kuzoba yisicoco sami sesikhombisa seligi. Ngisifuna kabi. Kuzoba okwesithathu kulandela (benqoba isicoco seligi) kithina. Kuzoba yisicoco sika-10 seMamelodi Sundowns. Iqembu libungaza iminyaka ewu-50. Siyazifuna lezi zicoco ezintathu. Yileyo inhloso yeqembu. Kodwa ke kumele sishaye iBidvest Wits. Siyazi kuzoba nzima kangakanani. Imidlalo yethu neWits ihleli ilukhuni,” kusho uKekana kwi-Independent Media.

UKekana wanqoba izicoco ezimbili zeligi kwiSuperSport United. KwiSundowns ubheke ukuthola esesihlanu. Uma amaBrazilians engakwazi ukugudluza iChiefs esicongweni, kuzobe uthola esesikhombisa.

“Kuningi okusikhuthazayo thina kule midlalo esele. Sonke siyakuqonda ukubaluleka kokuwina. Ukuqina komqondo yikhona okuzodingeka emidlalweni esele. Kuningi okungahlangene nebhola okwenzekayo. Kumele sizame ukukugwema. Sizozama ekutheni sigxile ekunqobeni imidlalo yethu,” kuqhuba uKekana.

Sekunezinyanga ezine ibhola limile kulandela ukuvalwa kwezwe ngenhloso yokulwa nokubhebhetheka kwegciwane iCorona.

“Bekungelula ukuhlala singenzi lutho izinyanga ezine. Sonke sijabule ngokuthi sesizobuya ekudlaleni senze lokhu esikuthandayo. Ngijabule ngokuthi sesibuyele esimeni esisijwayele, siyaziqeqesha silungiselela imidlalo.”

Lo mdlali oyibamba esiswini uthe ufuna bakhunjulwe njengesizukulwane sabadlali abaletha injabulo yodwa kwiSundowns.

“Sifuna ukukhunjulwa njengabadlali abaletha izindebe kwiMamelodi Sundowns. Sisebenza kanzima ukuqinisekisa lokho. Sineqembu elikwazi ukulwa. Ukhiye wukunqoba imidlalo yethu. Uma sinqoba eyethu imidlalo sizibeka ethubeni elihle. Yize injongo enkulu kuyizindebe ezintathu kodwa, sizobhekana nomdlalo ngamunye,” kusho uKekana.