Untula uxhaso owaseKZN oyomela izwe kowosozinyama eGermany
USOZINYAMA, uLindiwe Mchunu, ontula uxhaso lokuyobamba iqhaza emqhudelwaneni womhlaba wosozinyama i-World Open Classic Powerlifting Championships, ozobanjelwa eGermany, ngoJuni
Image: SITHUNYELWE
USOZINYAMA wesifazane ovelele waKwaZulu-Natal, uLindiwe Mchunu, uphakathi kosozinyama besifazane abayisishiyagalolunye abazomela iNingizimu Afrika emqhudelwaneni womhlaba wosozinyama iWorld Open Classic Powerlifting Championships.
Lo mqhudelwano womhlaba wosozinyama useChemnitz, eGermany ngoJuni 6-8. Kuzobe kudlana khona imilala osozinyama abaliqhamukisa emazweni ehlukene.
UMchunu (34) waseMandlanzini, eRichards Bay, ongomunye wosozinyama besifazane abavelele eNingizimu Afrika, uzibekisele indawo kulo mqhudelwano ngokuphumelela emqhudelwaneni wesifundazwe weKZN SA Classic Powerlifting Championships obuseThekwini ngoFebhuwari.
Udle umhlanganiso kulo mqhudelwano wesifundazwe ekhala emuka nendondo yokuba yiBest Lifter kwabesifazane.
Udlulele kokazwelonke iNational SA Classic Powerlifting Championship, obusePotchesfstroom, eNorth-West, ngoMashi lapho elale khona isithathu.
Nokho lo sozinyama ukhala ngokuntula uxhaso njengoba ethi izindleko zokuya eGermany zimba eqolo.
Ngakho ushaya indesheni kwabangamlekelela ngosizo lwanoma yiluphi uhlobo, okubalwa nemali yethikithi lebhanoyi nokunye.
“Ngikulungele ukuyobhekana nabanye osozinyama ezingeni lomhlaba kwiWorld Open Classic Powerlifting Championships, eGermany, ngenze iNingizimu Afrika iziqhenye, nesifundazwe sakithi iKwaZulu-Natal, ngokwenza kahle kulo mqhudelwano,” kusho uMchunu, owaqala ukuzihlanganisa nomdlalo wokuqukula izinsimbi ngo-2013.
“Kodwa-ke inkinga engibhekene nayo manje ukuntula uxhaso, yingakho ngicela noma ngubani ongaba nosizo.
I-South African Powerlifting Federation ephethe umdlalo wethu wokuqukula izinsimbi, ayinayo imali, yingakho besheshe basitshela ukuthi asizame ukuthola uxhaso.
"Ngidinga imali yethikithi lebhanoyi, yindawo yokulala iVisa nokubhalisa, okungadla imali engu-R80 000. Njengoba umqhudelwano uqala ngoJuni 6 mina kumele ngisuke lapha eNingizimu Afrika ngoJuni 1."
Ngokusho kukaMchunu, usuku lokugcina lokubhalisela iWorld Open Classic Powerlifting Championships, u-Ephreli 30.
*Kwabangase babe nosizo, inombolo atholakala kuyo uLindiwe Mchunu ngu-083 491 8812.