UKUQALA ngonyawo oluhle komqeqeshi uManqoba Mngqithi kwiLamontville Golden Arrows akungatshazwa ukuthi kuyalibuyisa ithemba kuleli qembu ngokuqeda isizini likwiTop 8 ekupheleni kwale sizini yeBetway Premiership eseziqala ukuhubela sakusha kuyo.
UMngqithi osengumakadebona ekuqeqesheni kwiPremiership ekuqaleni kukaMashi, ubuyele kwi-Arrows aqala kuyo ukuqeqesha esigabeni sePremiership, wayizuzela nendebe ye-MTN 8 eminyakeni engaphezulu kwengu-15 edlule.
Emidlalweni emine lo mqeqeshi esebhentshini laleli qembu, selibuye namaphuzu ayisikhombisa ngokunqoba emibili nokudlala ngokulingana nokwehlulwa kowodwa ngokwehlukana, okubalwa nokuguqisa iKaizer Chiefs ngo 2-1 ngeledlule eMoses Mabhida Stadium, eThekwini.
Ngakho ukuza kwe-Arrows kowasekhaya wePremiership neChippa United, eMpumalanga Stadium, eHammarsdale, namuhla ngo-3 ntambama, kuthathwa njengesikhuthazi sokugcina umgqigqo ngemuva komphumela omuhle womdlalo wayo wokugcina neChiefs ngeledlule.
Nokho iyobhekana neChippa edlala kahle muva nje neza kulo mdlalo inokuzethemba kulandela ukunqoba imidlalo emibili ilandelana ngokushaya iPolokwane City ngo 2-0, okulandelwe ukuguqisa AmaZulu ngo 2-1.
Ngaphandle kwalokho, iChilli Boys eqeqeshwa nguThabo September, iza kulo mdlalo kuthe gidi isibindi kwazise isibagingqe kabili kule sizini Abafana Bes’thende emiqhudelwaneni eyahlukene.
Ivulele isibhaxu sika 2-0 kuleli qembu laseLamontville kowomlenze wokuqala wesizini yePremiership eNelson Mandela Bay Stadium, eGqeberha, yaphinda yavulela esinye isibhaxu sika 2-1 koweNedbank Cup Last 32 esibayeni saBafana Bes’thende eHammarsdale, ngoJanuwari.
Ngakho lokhu kwenza umdlalo wanamuhla uthathwe njengowamagqubu, ikakhulukazi njengoba leli qembu laseThekwini libukeka selikhombisa izimpawu zokuvuka emaqandeni ngaphansi kwethimba elisha labaqeqeshi eliholwa nguMngqithi.
Ukwehluleka ukugcina umgqigqo ofanayo emidlalweni kwaBafana Bes’thende yinto ebikhathaza uMusa Bilankulu ongumqeqeshi obesabambile nozakwabo uKagisho Dikgacoi, manje asebengamaphini kaMngqithi.
Nokho kubukeka leyo nkinga iya ngokuya ixazululeka ngaphansi komqeqeshi uMngqithi, okulindelwe lukhulu kuyena ekubuyiseni uzinzo kuleli qembu, elibheke ukuqeda kwiTop 8 emuva kwamasizini amathathu lehluleka.