UJenet uzovula unyaka ngeLushaba Half Marathon
Isithombe UMGIJIMI, uJenet Mbhele, ozosebenzisa i-Arnold Mfundo Lushaba Half Marathon yebanga lika-21km kusasa, eMzumbe, njengomunye wemijaho azozicijela ngayo iComrades Marathon yangoJuni
Image: SITHUNYELWE
UNQUME ukuyigabha nakulo nyaka iTotalsports Two Oceans Marathon, umgijmi wamabanga amade, uJenet Mbhele, ovivela ukuyokhipha amanye amangwevu kwiComrades Marathon ezoba ngoJuni.
UMbhele (30) ongomunye wabagijimi besifazane abansundu baseNingizimu Afrika abenza kahle emijahweni yamabanga amade, ukuqinisekisile ukuthi ngeke alibambe iqhaza kwiTwo Oceans yebanga lika-56km ezogijinywa ngo-Ephreli 11, eKapa.
Esikhundleni salokho uzosebenzisa imijaho emibili ukuzicijela iComrades yebanga lika-87km ezogijinywa ngoJuni 14 kukhushukwa kusukwa eThekwini kubhekwe eMgungundlovu. Uzovula unyaka ngokuzifudumeza ngomjaho webanga lika-21km, iMfundo Arnold Lushaba Half Marathon, alandele ngePrince Mangosuthu Ultra Marathon yebanga lika-52km, ezogijinywa ngo-Ephreli 26.
ILushaba Half Marathon ehlanganisa nebanga lika-10km, izogijnywa ngeSonto ngo-6 ekuseni isukela eSibanini Sports Ground, eMzumbe, iphelele khona kule nkundla.
Lo mjaho oqanjwe ngowayeyimeya kaMasipala waseMzumbe, uMfundo Lushaba, nonyaka uzobe ugijinywa okwesihlanu kusukela ngo-2022 uqala ukugijinywa ngokugcwele njenge-half marathon.
“Ngizogijima umjaho wami wokuqala kulo nyaka, ngokugijima iMfundo Lushaba Half Marathon, okungomunye wemijaho engizoyisebenzisa emalungiselelweni ami okuyogijima iComrades ngoJuni. Ngeke ngiyigijime iTwo Oceans, ngoba asiyihlelelanga nomqeqeshi wami, uThami Khuboni,' kusho uMbhele.
"Esikhundleni sayo ngizobuyela kwiPrince Mangosuthu engiyigijimile ngonyaka odlule ngenza kahle kuyo ngithatha indawo yesibili, nokuyiyona engizimisele ngokuyisebenzisa kakhulu ekuzilungiseleleni iComrades.”
UMbhele ukubagijimi besifazane ababhekiwe kwiMfundo Lushaba Marathon njengoba nyakenye aphuma isibili kulo mjaho ngesikhathi esingu-1:20:41, elandela uMalineo Mahloko waseLesotho owadla umhlanganiso ngesikhathi esingu-1:20:17.
“Isifiso sami esikhulu kulo nyaka wukuthola elinye igolide kwiComrades, ngokuqeda kwabahlanu bokuqala, engikholwa wukuthi kungabagqugquzela abanye abagiimi besifazane abaningi abamnyama ngokuthi nabo bangakwenza lokhu engikwenzayo,” kuqhuba uMbhele oshiye i-Xcel Running Club nyakenye wabuyela ekilabhini yakhe endala, Umzimkhulu Striders.
Walala isine kwiTwo Oceans eyigijima okokuqala ngo-2024, nyakenye wathatha indawo yesikhombisa kwabesifazane kwiComrades Marathon.
Usethubeni lokuqopha umlando nonyaka uma ephinde ethola elinye igolide ngokuba ngumgijimi wokuqala wesifazane onsundu ukuthola amagolide amane kulo mjaho, njengoba esephethe amathathu.