Kuzovuka amagqubu koweT20 wamaProteas ne-India
UMSHWIBI wamaProteas uKagiso Rabada.
Image: X / PROTEAS MEN
LIZOBHEKANA namaqembu elisanda kudlala nawo esigabeni sesibili samaqoqo seNdebe yoMhlaba, iSuper Eight, iqembu lesizwe labesilisa lekhilikithi.
AmaProteas angene kulesi sigaba ngokuyinqoba yomine imidlalo eliyidlale esigabeni sokuqala samaqoqo, linqoba iCanada, Afghanistan, New Zealand ne-United Arab Emirates.
KwiSuper Eight aqhathwe ne-India, West Indies neZimbabwe kuGroup 1. Amaqembu amabili azoqeda phezulu kuleli qoqo azodlulela emidlalweni eyandulela owamanqamu.
Iqembu lakuleli lizovula ne-India eNarendra Modi Stadium, edolobheni i-Ahmedabad, e-India, ngeSonto ngo-3.30 ntambama.
La maqembu abhekana kowamanqamu eNdebeni yoMhlaba yeT20 ngo-2024, kwanqoba i-India ngamawikhethi ayisikhombisa.
Asanda kudlala uchungechunge lweT20 ngoDisemba nyakenye, kwanqoba i-India ngo 3-1.
AmaProteas adlale imidlalo emibili neZimbabwe ngoJulayi wangonyaka odlule, ayinqoba yomibili, kanti asanda kubhekana neWest Indies ngenyanga edlule, anqoba ngo 2-1.
Azobhekana ne-India neWest Indies e-Ahmedabad ngoLwesine, adlale owokugcina wamaqoqo neZimbabwe eNew Delhi ngoMashi 1.
I-India neWest Indies bayinqobe yomine imidlalo yamaqoqo kanti iZimbabwe nayo iyinqobe yomithathu eyidlalile, owodwa wabhuntshiswa yimvula.
Lokhu kusho ukuthi iqembu lakuleli lizobhekana namanye amaqembu asefomini kulo mqhudelwano.