Uzobanjelwa eManguzi owe-netball waseKZN
UMENGAMELI weKZN Netall uGugu Ngema, uNdunankulu waKwaZulu-Natal uThami Ntuli, uMengameli weSports Confederation uThami Mchunu noMphathiswa wezeMidlalo, ubuCiko namaSiko uMntomuhle Khawula nabadlali be-netball ngesikhathi kwethulwa umqhudelwano iKZN Premier's Netball Cup eThekwini izolo
Image: Isithombe:BACKPAGEPIX
UZODLALELWA eManguzi Multi-Purpose Centre, KwaMhlabuyalingana, kusukela ngoLwesine kuze kube yiSonto umqhudelwano wanonyaka weKZN Netball Premier’s Cup.
Lo mqhudelwano osungulwe ngonyaka odlule, uhlanganisa amaqembu amele zonke izifunda zaKwaZulu-Natal.
KuGroup A kuzobe kududulana iqembu elidle isicoco nyakenye, Inkosi All Stars yaseKing Cetshwayo, i-Ocean Netters yaseThekwini, iPlace of Elephant yaseMgungundlovu, i-Ugu All Stars yasoGwini, iKing Shaka emele iLembe neVigilant Eagles yaseZululand.
KuGroup B kuqhathwe iBeach Blitz yaseThekwini elilale isibili nyakenye, iPeacemakers yaseMajuba, iDragon Mountain Ladies emele uThukela, iBuffaloes yaseMzinyathi, uMkhanyakude Bateleurs neHarrycains yaseHarry Gwala.
UNdunankulu waKwaZulu-Natal, uThami Ntuli, uthe lo mqhudelwano ungenye yezindlela zokufukula imidlalo yabesifazane kulesi sifundazwe.
“Lo mqhudelwano uhambe kahle ngonyaka odlule. Kumqoka kithina njengohulumeni ukufukula imidlalo yabesifazane engakakutholi ukwesekwa ngezinga elifanayo neyabesilisa. Sizoqhubeka nemizamo yokuguqula lokhu ngoba sifuna ukudlulisa umyalezo wokuthi uma abesifazane benikwa amathuba bashaya into ecokeme,” usho kanje.
Umcimbi wokuqhathwa kwamaqembu ubuhanjelwe yizikhulu zezemidlalo eKZN, okubalwa kuzona uMphathiswa wezeMidlalo, ubuCiko namaSiko, uMntomuhle Khawula, umengameli weKZN Sports Confederation, uThami Mchunu nomengameli weKZN Netball, uGugu Ngema.
“Siyethemba ukuthi abantu baKwaZulu-Natal bazophuma ngobuningi bayobukela le midlalo. Lo mqhudelwano awuqondene nabathandi be-netball kuphela kodwa owabo bonke abantu baKwaZulu-Natal, ikakhulukazi labo abathanda ezemidlalo. Sifisa ukubona namaciko nabantu bakweminye imikhakha bezokweseka lo mqhudelwano,” kusho uKhawula.
UNgema uthe beyi-KZN Netball bazimisele ukuthi izinga lalo mqhudelwano likhuphuke minyaka yonke.
“Siyazi ukuthi unyaka wesibili futhi kuningi esingakwenza kangcono. Siyafunda kweminye imidlalo njengonobhutshuzwayo okade waqala ukuba nePremier’s Cup. Siyathembisa ukuthi sizoba nomqhudelwano isifundazwe sethu esingaziqhenya ngawo,” usho kanje.