ISharks izopheshukelwa ngenye insika yamaBhokobhoko
NGU-GRANT Williams okuvela ukuthi uzoshiya iHollywoodbets Sharks ekupheleni kwesizini
Image: sigciniwe
I-HOLLYWOODBETS Sharks izopheshukelwa ngomunye wabadlali abamqoka kuyona, uGrant Williams, odlala nakumaBhokobhoko osethole amadlelo aluhlaza eJapan.
Leli qembu eliphekwa nguJP Pietersen kalihleli kahle kwi-log ye-United Rugby Championship (URC) kodwa uma lingaqhubeka nefomu okuyiwe ekhefini le-Six Nations lihamba ngayo, makhulu amathuba okuthi lizifake emidlalweni yokuhlunga kulo mqhudelwano.
EzikaPietersen zizobuyela enkudleni ngokuvakashela i-Emirates Lions esemhlane wazo kwi-log ekubeni zibambene ngamaphuzu angu-24 iqembu ngalinye. Iqembu elizonqoba lizongena ligijima kwi-Top 8.
Lo mdlalo okusobala ukuthi umqoka nhlangothi zombili, uzoba ngoMgqibelo ngo-2 ntambama, e-Ellis Park Stadium, eGoli.
ISharks esanda kumemezela ukuhlukana kwayo nokaputeni wamaBhokobhoko, uSiya Kolisi ophindela kwiDHL Stormers, izophinde ihlukane noWilliams owafika kuyona ngo-2018, esuka esikoleni ePaarl Gymnasium.
Kuvela imibiko ekhomba ukuthi uWilliams - ophelelwa yinkontileka neSharks ngoJuni - uqome ukungayivuseleli kwazise useqomile eJapan.
Kuthiwa iSharks useyazisile ngesinqumo sakhe sokungayivuseleli inkontileka nesifiso sakhe sokuyozama impilo ehlukile eJapan.
Kuthiwa uWilliams kumanje useJapan ngenhloso yokuyozijwayeza indawo nendlela yokuphila kwazise kusukela ngoJulayi uzobe esehlala kuleli lizwe okunenqwaba yamaBhokobhoko edlala kulona.
Ezivela ePitoli, zikhomba ukuthi uzakwabo kaWilliams kumaBhokobhoko, uKurt-Lee Arendse, naye usendleleni ebuyela eJapan, kwazise wake wadlala khona phambilini.
Yize imibiko ibakhomba eJapan ngesikhathi esisodwa kodwa uWilliams no-Arendse kabayi ukuyodlalela iqembu elilodwa.
UWilliams ushiya iSharks nje, iseyintsha nendaba yokuhamba kukaLukhanyo Am okwiDynaboars yaseJapan ayijoyine ngoNovemba, esuka kuleli qembu laseThekwini.