IKruger ishubise umbango kwiChampionship
Isithombe UCELIMPILO Ngema ongomunye wabadlali abamqoka kwiKruger United elokhu iqhubekile nokushubisa umbango wesicoco seligi kwiMotsepe Foundation Championship
Image: BACKPAGEPIX
I-KRUGER United iphinde yakhombisa ukuthi ayizimisele ngokuphuma embangweni wesicoco seligi yeMotsepe Foundation Championship ngokuguqisa i-Upington City ngo 2-1 KaNyamazane Stadium KaNyamazane, ngoMgqibelo.
Amagoli kaKhethukuthula “Jaguar” Ndlovu noCelimpilo “Zidane” Ngema yiwona aqinisekise ukuthi leli qembu laseBushbuckridge liwathatha womathathu amaphuzu kulo mdlalo. Ngalokhu lenyukele endaweni yesibili kwi-log ngamaphuzu angu-33, ngemuva kweMilford esesicongweni ngawu-36.
IKruger ibuya namaphuzu nje, enye yezimbangi zayo iCasric Stars iwalahlile ibambana ngo 2-2 neHungry Lions ngoMgqibelo, eMxolisi Dicky Jacobs Stadium, e-Upington.
Leli qembu liqashe u-Abram Mongoya ngo-Okthoba, kwesokuqeqesha ngemuva kokuhamba kukaVusumuzi Vilakazi ethatha izintambo kwiChippa United. Kubukeka seliqala ukuvuna izithelo zokuqinisa isikwati salo ngabadlali abanamava okubalwa kubona uKhethukuthula "Jaquar" Ndlovu, Celimpilo Ngema, Sipho Sibiya ongukaputeni, Tercious Malepe, Ntsako Makhubela noLindokuhle “Ma11” Mtshali osayine emasontweni adlule.
Leli qembu laseBushbuckridge lisazodlala nezinye izimbangi zalo embangweni weligi okuyiCasric, iMilford neCape Town City.
ICasric ebisendaweni yesibili kwi-log, yehlele kweyesine. Endaweni yesithathu kwenyukele iCape Town City eqoqe amaphuzu amqoka ibhaxabula iMidlands Wanderers ngo 4-1 izolo, e-Athlone Stadium, eKapa.
Kwenzeka lokhu nje, iMilford iphinde yakhombisa ukuthi ayizimisele ngokusuka esicongweni se-log yeMotsepe Championship, ishaya iHighbury FC ngo 1-0 eMhlathuze Sports Complex, eRichards Bay.
IMilford, eqeqeshwa uXanti Pupuma esiqhwakele isikhathi eside kwi-log, kubhekwe ngabomvu ukuthi izokwazi yini ukubamba umgqigqo kuze kuphele isizini, ikakhulukazi njengoba isazodlala namaqembu ebanga nawo isicoco okuyiKruger, iCasric neCity.
Lena yiyona imidlalo engase icacise ngamathuba aleli qembu laseRichards Bay lokudla isicoco seligi yeChampionship, lilandele ezinyathelweni zamanye aKwaZulu-Natal, iDurban City elisinqobe ngesizini edlule.