Ithemba lokunyuka kwelabesifazane leSevens

UNCOME abadlali ngokuzimisela emqhudelwaneni wokuqala weHBSC SVNS 2 umqeqeshi weqembu lesizwe labesifazane lombhoxo weSevens, uCecil Afrika.

IMbokodo iqede emdaweni yesibili kulo mqhudelwano obubanjelwe eNairobi, eKenya, ngempelasonto.

Emdlalweni wayo wokuqala ngoMgqibelo iguqise iSpain ngo 14-12, kowesibili yanqotshwa yiBrazil ngo 12-0, kwathi kowesithathu yaguqisa osokhaya, iKenya ngo 12-10.

Ibuye ngamandla ngeSonto lixebula iChina ngo 33-5, yathela othulini i-Argentina ngo 17-12.

I-Argentina iyona ehamba phambili kwi-log ngamaphuzu angu-20, ilandelwe yiNingizimu Afrika ngamaphuzu angu-18 neSpain ngangu-16.

IChina inamaphuzu angu-14, iKenya angu-12, iBrazil isemsileni ngangu-10.

Kusazodlalwa imiqhudelwano emibili ezobanjelwa eMontevideo, e-Uruguay ngoMashi 21 kuya ku-22, naseSao Paulo, eBrazil, ngoMashi 28 kuya ku-29.

Amaqembu amane azoqeda phezulu kwi-log azozibekisela izindawo emqhudelwaneni omkhulu iSVNS World Championship Series, ozodlalelwa eHong Kong, Spain naseFrance kusukela ngo-Ephreli kuya kuJuni.

“Amantombazane abambisane kahle futhi akhombisa ukuthi kusho lukhulu kangakanani ukumela izwe. Asiqalanga kahle ngosuku lokuqala yize siwunqobile umdlalo wethu neSpain. Indlela esinqotshwe ngayo yiBrazil isikhombisile ukuthi besinenkinga yokungawasebenzisi amathuba,” kusho u-Afrika.

“Sikwenze kangcono lokho emidlalweni yangeSonto. Kuningi esikufundile okuzosisiza uma sesilungiselela le miqhudelwano emibili ezayo. Sisendaweni yesibili kwi-log, okusho ukuthhi sisethubeni lokuqeda kwiTop 4, ngakho-ke sikwenzile ebesikuhlosile kulo mqhudelwano.”

Inyamazane yeMbokodo, uMaria Tshiremba, iqhubekile nokugqama ishaya ama-try amane kulo mqhudelwano kanti uNadine Roos uhlanganise amaphuzu angu-21, okubalwa kuwona i-try nama-conversion ayisishiyagalombili.