UNgidi ukhuthaza eyokwenza izinto 'ezilula' eNdebeni yoMhlaba
UMSHWIBI wamaProteas uLungi Ngidi othathe amawikhethi amane emdlalweni wokuvula weNdebe yoMhlaba
Image: X / PROTEAS
UBONA kuzolisiza iqembu eNdebeni yoMhlaba ye-T20 ukuqinisa ekwenzeni izinto ezijwayelekile ngendlela efanele umshwibi weqembu lesizwe lekhilikithi labesilisa, uLungi Ngidi.
UNgidi uthathe amawikhethi amane ngesikhathi amaProteas eguqisa iCanada ngama-run angu-57 emdlalweni wokuqala wamaqoqo eNdebeni yoMhlaba ese-India naseSri Lanka.
Iqembu lakuleli libhethe kuqala lashaya ama-run angu-213 kuma-over angu-20, kusaphume abadlali abane. ICanada iqede ama-over angu-20 isahlanganise ama-run angu-156, sekuphume abadlali abayisishiyagalombili.
“Besinolwazi mayelana nenkundla kodwa bekusadingeka ukuthi sidlale ngobunyonico ukuze ibhola lihambe ngendlela ebesifuna lihambe ngayo uma sishwiba, sifake ingcindezi uma ibhola liselisha, singezi izinto eziseceleni,” kusho uNgidi.
“Into esizayo uma udlala ezinkundleni ezifana nalezi wukushwiba ngamandla ukuze ibhola libhampe kodwa futhi kumqoka ukuthi ubuye usehlise isivinini ukuze kungabi lula ukuthi abadlali ababhethayo baqagele ukuthi kuzolandela ibhola elinjani.”
AmaProteas asaqhubeka nokudlalela eNarendra Modi Stadium, e-Ahmedabad, njengoba ebhekene ne-Afghanistan kowesibili wamaqoqo ngoLwesibili ngo-7.30 ekuseni bese etholana phezulu neNew Zealand ngoMgqibelo ntambama.
UNgidi uthe kulolu hlobo lwekhilikithi alikho iqembu ongalithatha kancane njengoba izinto zingajika kalula kuma-over angu-20.
“Ngicabanga ukuthi isibalo esilindelekile sama-run kule nkundla kungaba angu-180. Yinkundla enhle evuna abadlali abashwibayo nababhethayo," kuqhuba yena.
"ICanada ikwazile ukukhipha abadlali bethu abane maphakathi ne-innings. Thina sikhiphe abadlali bayo abane isanda kuqala ukubhetha, kodwa ikwazile ukuwadlala wonke ama-over ayo.
“Lokhu kukhombisa ukuthi uma uyihlonipha le nkundla njengomshwibi noma umdlali obhethayo kukhona ozokuhlomula.”
Amaqembu amabili azoqeda phezulu eqoqweni ngalinye kwamane akulo mqhudelwano azodlulela kwesinye isigaba samaqoqo esaziwa ngeSuper Eight.
Azophuma phambili kwiSuper Eight azobe esedlulela emidlalweni eyandulela owamanqamu.