Omakadebona kwawamaProteas esifazane azobhekana nePakistan
KUBOSHELWE abadlali abanamava eqenjini lesizwe labesifazane lekhilikithi elizobhekana nePakistan kuleli.
Image: ICC
UMQEQESHI weqembu lesizwe labesifazane lekhilikithi, uMandla Mashimbyi, umemezele izikwati ezimbili ezizodlala uchungechunge lwe-T20 nolwama-One Day International nePakistan kusukela ngenyanga ezayo kuya kuMashi.
La maqembu azodudulana kwemithathu ye-T20, eyingxenye yamalungiselelo eNdebe yoMhlaba ezobanjelwa e-England naseWales ngoJuni kuya kuJulayi nonyaka.
Kuwona kufakwe owake waba ngukaputeni weqembu lika-Under-19, uKayla Reyneke, oqalayo ukubizelwa eqenjini elikhulu.
Uzongena eqenjini elinomakadebona asebedlale imiqhudelwano emikhulu eminingi okubalwa kubona ukaputeni uLaura Wolvaardt, Chloé Tryon, Nadine de Klerk, Marizanne Kapp, Masabata Klaas, Ayabonga Khaka, Nonkululeko Mlaba nabanye.
Uchungechunge lwe-ODI luyingxenye yomqhudelwano i-ICC Women’s Championship ozosongwa ngo-Ephreli ka-2029.
Lo mqhudelwano uzosetshenziswa ukuhlungela iNdebe yoMhlaba yango-2019 ezodlalwa ngamaqembu angu-10. Phambilini lo mqhudelwano ubudlalwa amaqembu ayisishiyagalolunye.
Eqenjini le-ODI kwenziwe izinguquko ezine. ULara Goodall, Faye Tunnicliffe, Nondumiso Shangase noTumi Sekhukhune bazovala izikhala zikaKhaka, Klaas, Reyneke noDane van Niekerk.
AmaProteas azohlangana ePotchefstroom ngoLwesine. Uchungechunge lwe-T20 luzodlalwa ngoFebhuwari 10 kuya ku-16, olwe-ODI ludlalwe ngoFebhuwari 22 kuya kuMashi 1.
“Sijabule ngoba sikwazile ukukhetha izikwati ezimbili eziqinile ngaphambi kwale midlalo esikholwa ukuthi izoba nzima. Sisazobhekana neNew Zealand ne-India ngaphambi kweNdebe yomhlaba ye-T20,” usho kanje uMashimbyi.
“Iqembu liyazethemba ngenxa yendlela esisonge ngayo unyaka ka-2025 kodwa sesidinga ukunyukela kwelinye izinga. Umdlali ngamunye kufanele aqinisekise ukuthi uyathuthuka uma kuqhathaniswa nonyaka odlule.”
Iqembu lamaProteas esifazane leT20: Laura Wolvaardt, Masabata Klaas, Suné Luus (Fidelity Titans); Tazmin Brits, Sinalo Jafta, Ayabonga Khaka, Karabo Meso, Chloé Tryon (DP World Lions); Nadine de Klerk, Marizanne Kapp, Kayla Reyneke, Dané van Niekerk (World Sports Betting Western Province); Annerie Dercksen (Garden Route Badgers); Ayanda Hlubi, Nonkululeko Mlaba (Hollywoodbets Dolphins).
Iqembu lamaProteas esifazane le-ODI: Laura Wolvaardt , Suné Luus (Fidelity Titans); Tazmin Brits, Sinalo Jafta, Karabo Meso, Tumi Sekhukhune, Chloé Tryon (DP World Lions); Nadine de Klerk, Marizanne Kapp, Lara Goodall, Faye Tunnicliffe (World Sports Betting Western Province); Annerie Dercksen (Garden Route Badgers); Ayanda Hlubi, Nonkululeko Mlaba, Nondumiso Shangase (Hollywoodbets Dolphins).