Kuvela elikaMiddendorp kwabazovala esikaBadela kwiCity
Isithombe USINETHEMBA Badela osekhonjwe indlela yiDurban City ngemuva kwemidlalo emithathu kuphela engumqeqeshi waleli qembu, athathe izintambo kulo ekupheleni kukaDisemba
Image: BACKPAGEPIX
SEKUQUBUKE ukuqagela ngozovala isikhala sikaSinethemba Badela okhonjwe indlela yiDurban City emuva kwemidlalo emithathu ehola leli qembu elidlala kwiBetway Premiership.
UBadela (36) izolo ngemuva kwezinsuku ezimbalwa efake iCity kwi-Last 16 yeNedbank Cup ngokuguqisa iChipppa United ngo 3-2 emdlalweni we-Last 32 obungoLwesihlanu eChatsworth Stadium, eThekwini.
Lo mqeqeshi uthathe izintambo zokuqeqesha kwiCity ekupheleni kukaDisemba emuva kokuxoshwa kukaGavin Hunt. Emidlalweni emithathu esebhentshini leCity, uBadela uhlulwe kanye wawina kabili. Ngesikhathi iqembu liziqeqesha izolo beliholwa nguPitso Dladla obeyiphini likaBadela no-Ashraf Hendricks oqeqesha isikimu seDStv Diski Challenge. Kunamahlebezi athi u-Ernst Middendorp oyi-Technical Director ufuna ukuzibambela mathupha.
Ngokwesitatimende esikhishwe yiCity, isinqumo sokwehlukana kukaBadela neqembu asihlangene nemiphumela nendlela yokuziphatha kwakhe kodwa sincike kakhulu ezinhlosweni zaleli qembu zokuthola imiphumela ngokushesha emidlalweni esele kule sizini esimaphakathi.
“Iqembu liyawathakasela amagalelo kaBadela nezinhlelo zakhe zebhola lesimanje, ebezihambisana kakhulu nemigomo yeqembu yokuphokophelela impumelelo ngomuso.
"Kodwa ngemuva kokubuyekeza izinhloso zeqembu zokuthola imiphumela ngokushesha, sibone kuzothatha isikhathi ukuthi akwazi (uBadela) ukuyifaka ngokugcwele eqenjini indlela afuna kudlalwe ngayo ngalesi sikhathi sesizini.
"Njengoba sekusele imidlalo engu-13 kusongwe isizini, iqembu libone kunesidingo sokuthola indlela esheshayo namava ekutholeni imiphumela esheshayo.
"Iqembu lizocacisa ngezinhlelo zesikhashana ethimbeni labaqeqeshi, nokuqokwa komqeqeshi omusha ngesikhathi esifanele,” kusho isitatimende.
UDladla kulindeleke ahlale ebhentshini ngoLwesihlanu ngo-7.30, eChatsworth Stadium, eThekwini, uma leli qembu selibhekene neTS Galaxy emdlalweni weBetway Premiership.