IMan City nenselelo yokuvala igebe kwi-Arsenal ngoweLiverpool

LIVERPOOL V MANCHESTER CITY

E-ANFIELD, E-LIVERPOOL

KUSASA NGO-6.30-PM

ENGLISH PREMIER LEAGUE

ABALANDELI bebhola le-English Premier League namaphanta jikelele baqala uFebhuwari ngomdlalo ohlabahlosile wokududulana kwezingqungqulu iLiverpool neManchester City obhekwe ngabomvu kusasa ngo-6.30 ntambama, e-Anfield, eLiverpool.

Lo mdlalo umqoka kuwona womabili la maqembu ngezindlela ezahlukene. ILiverpool okuyiyona edlalela ekhaya, iza kulo mdlalo nje ikhombisa izimpawu zokubuyelwa yifomu, njengoba emidlalweni eyisithupha yakamuva inqobe emine, yahlulwa kowodwa yadlala ngokulingana kowodwa kuyo yonke imiqhudelwano. 

Kwegcine ukuwudlala ngeledlule, inabise iNewcastle United ngo 4-1 kowePremier League.

Ngakolunye uhlangothi, iMan City esendaweni yesibili kwi-log, ibhala iyacisha emidlalweni yeligi njengoba kweyisithupha yeligi kusukela ngoJanuwari inqobe owodwa, yadlala ngokulingana kwemine, yahlulwa kowodwa.

Ngeledlule iphinde yalahla elinye ithuba lokuvala igebe phakathi kwayo ne-Arsenal ibambana ngo 2-2 neTottenham Hotspur. Nokho ukubhaxabula kwayo iNewcastle ngo 3-1 koweCaraboa Cup ngoLwesithathu, ingakuthatha njengesikhuthazi ngaphambi komdlalo wakusasa neLiverpool.   ICity ilahla amaphuzu nje, izimbangi zayo i-Arsenal zivule igebe ngokunenebula iLeeds United ngo 4-0 ngeledlule.

Nakuba iLiverpool ikhombisa izimpawu zokubuyelwa yifomu kodwa aseyinciphele amathuba okuba semshungwini wamaqembu asembangweni wesicoco seligi. 

Kodwa ukudlalela kwayo ekhaya phambi kwezinkumbi zabalandeli bayo e-Anfield, akubuzwa ukuthi kuzoba yisikhuthazi esikhulu kuleli qembu eliqeqeshwa u-Arne Slot. Ukunqoba kwalo kunganikeza i-Arsenal ithuba lokunweba igebe esicongweni se-log. 

I-Arsenal ivule igebe lamaphuzu ayisithupha phakathi kwayo neMan City esendaweni yesibili njengoba iqhwakele ngawu-53. ICity ilandela endaweni yesibili ngawu-47. 

I-The Gunners ezodlala neSunderland namuhla ngo-5 ntambama e-Emirates Stadium, eLondon, ukunqoba kwayo namuhla kungayinika ithuba lokuvula igebe ngamaphuzu ayisishiyagalolunye phakathi kwayo ne-The Citizens. 

“Ngiyakhumbula ngenkathi sidlala nabo (iMan City) emzuliswaneni wokuqala wesizini ukuthi basithwaliswa kanzima ingxenye enkulu yesiwombe sokuqala. Ngakho lo mdlalo esizowudlala nabo yiwona esizokwazi ukuzikala ngawo ukuthi sesidlala kangcono kangakanani kusukela emzuliswaneni wokuqala wesizini. 

Siyakwazi ukubaluleka komphumela walo mdlalo esizowudlala. Umzuliswano wesibili wesizini manje, ngakho imiphumela ibaluleke kakhulu,” kusho uSlot, ecashunwa yi-BBC Sport. 

USlot usho kanjena nje, ezakhe zanatshiswa yi-The Citizens ngo 3-0 emzuliswaneni wokuqala wesizini e-Etihad Stadium, eManchester, ngoNovemba. 

Imidlalo ye-English Premier League: 

Namuhla - Ngo-2.30pm: Manchester United v Tottenham Hotspur

Ngo-5pm: Arsenal v Sunderland; Bournemouth v Aston Villa; Burnley v West Ham; Fulham v Everton; Wolverhampton v Chelsea

Ngo-7.30pm: Newcastle United v Brentford

Kusasa - Ngo-4pm: Brighton v Crystal Palace 

Ngo-6.30pm: Liverpool v Manchester City