IChiefs ethubeni lama-quarterfinal ixebula i-Al Masry koweCaf

Kaizer Chiefs (1) 2

Al Masry (0) 1

IKAIZER Chiefs izibeke ethubeni lokudlulela kuma-quarterfinal eCaf Confederation Cup iguqisa i-Al Masry yase-Egypt emdlalweni kaGroup D ePeter Mokaba Stadium, ePolokwane, ngeSonto ntambama. 

Amagoli enqobe ngawo iChiefs kulo mdlalo kube yiphenathi evalelwe phakathi nguFlavio Silva ngesiwombe sokuqala no-Aden McCarthy kukade kuyi-free kick ngesesibili. 

Ele-Al Masry lishaywe ngu-Abderrarhim Deghmoum ngesiwombe sesibili. 

Ngaphandle kokuzibeka ethubeni lokuya kuma-quarterfinal, iChiefs ikhokhe isibhongo kwi-Al Masry eyayiguqisa ngo 2-1 emdlalweni wokuvula kaGroup D ngoNovemba eSuez, e-Egypt. 

IChiefs beyiye kulo mdlalo idinga amaphuzu amathathu ukuze izibeke ethubeni lokudlulela kuma-quarterfinal alo mqhudelwano. Isiqhwakele kuGroup D ngamaphuzu angu-10 emuva kwemidlalo eyisihlanu.

Ilandelwa yiZamalek endaweni yesibili ngayisishiyagalombili, kweyesithathu kube yi-Al Masry ngayisikhombisa. Amakhosi asedinga iphuzu emdlalweni wokusonga uGroup D uma esebhekene neZamalek eCairo International Stadium, e-Egypt, ngoMgqibelo.

Ukushaywa kweZamalek kungalindelwe, iguqiswa ngo 1-0 yiZesco United eLevy Mwanawasa Stadium, eNdola, eZamba, ngalo iSonto, yikho okwenze iChiefs yaqhwakela esicongweni igudluza leli qembu lase-Egypt okuyilona ebelisesicongweni.

I-Al Masry kudingeka inqobe nakanjani kwiZesco ngawo uMgqibelo, eSuez, e-Egypt, ukuze izoqeda endaweni yesibili kuGroup D, nayo izibekisele indawo kuma-quarterfinal.