I-Al Masry iphethe ukhiye weChiefs kwiConfed
Isithombe UMGADLI weKaizer Chiefs, uGlody Lilepo, okubhekwe ifomu yakhe yakamuva yokushaya amagoli emdlalweni weCaf Confederation Cup ne-Al Masry ePeter Mokaba Stadium, ePolokwane, kusasa ntambama
Image: BACKPAGEPIX
IFOMU yakamuva yeKaizer Chiefs emidlalweni yeCaf Confederation Cup kufanele ibe yisikhuthazi emidlalweni yayo emibili yokusonga isigaba samaqoqo ukuze izibeke ethubeni lokudlulela kuma-quarterfinal alo mqhudelwano.
Emidlalweni emibili yakamuva, iChiefs ibuye namaphuzu ayisithupha imidlalo ilandelana ishaya iZesco United yaseZambia ngo 1-0 esibayeni sayo eLevy Mwanawasa Stadium, eNdola, ngoJanuwari 25. Iphinde yayithela isibhaxu sika 1-0 eMoses Mabhida Stadium, eThekwini, ngempelasonto edlule.
IChiefs izodudulana ne-Al Masry yase-Egypt emdlalweni kaGroup D weConfederation Cup ngeSonto ngo-3 ntambama ePeter Mokaba Stadium, ePolokwane.
Ngaphandle kobumqoka balo mdlalo kuwona womabili la maqembu, ufaniswa nowamagqubu kwazise i-Al Masry ivulele isibhaxu sika 2-1 kwiChiefs emdlalweni wokuvula kaGroup D ngoNovemba eSuez, e-Egypt.
Umqeqeshi waMakhosi, uCedric Kaze, ukuqonda kahle ukubaluleka kokukhipha kwezakhe amangwevu kulo mqhudelwano ngenhloso yokuthoba izinhliziyo zabalandeli baleli qembu kulandela ukuphoxeka kwabo likhishwa ekuseni yiStellenbosch FC ngo 2-1 kwiNedbank Cup ngoLwesithathu.
“Ukwehlulwa kwethu kwiNedbank Cup kuyisifundo kuwona wonke umuntu ukuthi ayikho into eza kalula. Ingcindezi yinto ehlezi ikhona nsuku zonke eqenjini elinjengeChiefs. Kuzomele senze kwenzeke emidlalweni yeligi neyeCaf Confederation, futhi siyazethemba ngoba sinazo izikhali zokufeza umsebenzi,” kusho uKaze oqeqesha ngokubambisana noKhali Ben Youssef.”
IChiefs esendaweni yesithathu ne-Al Masry ekweyesibili, babambene ngamaphuzu ayisikhombisa emidlalweni emine. Al Masry ingenhla kwaMakhosi ngenxa yomehluko wamagoli. iZamalek yase-Egypt isesicongweni ngamaphuzu ayisishiyagalombili. Emsileni kuhlezi iZESCO eneqanda. Amaqembu amabili azoqeda phezulu kuGroup D azodlulela kuma-quarterfinal eConfederation Cup.
Umehluko wamagoli phakathi kwaMakhosi ne-The Green Eagles, uphoqa ukuthi Amakhosi ashaye amagoli amabili kulo mdlalo wakusasa, angadedeli nelilodwa ukuze azibeke ethubeni elingcono lokudlulela kuma-quarterfinal. Emdlalweni wokugcina weqoqo, iChiefs izobhekana neZamalek eCairo International Stadium, e-Egypt, ngoFebhuwari 14.