UGabriel ulindele lukhulu kuBarns okhuze ibuya kwiBay
Isithombe USANELE Barns othathwe edlubhe ijezi leRichards Bay FC okokuqala ekhuze ibuya kuyona ngesikhathi ibhekene neLamontville Golden Arrows emdlalweni weBetway Premiership eMhlathuze Sports Complex, eRichards Bay ngesonto eledlule
Image: BACKPAGEPIX
UMQEQESHI weRichards Bay FC, uRonnie Gabriel, akangabazi nakancane ukuthi uSanele Barns uzoba wusizo kuleli qembu ngenxa yolwazi analo ngendlela elidlala ngayo.
UBarns (28) osanda kukhuza ibuya kwiBay, udlale umdlalo wakhe wokuqala ebuye kuleli qembu libambana ngo 2-2 neLamontville Golden Arrows emdlalweni weBetway Premiership ngoLwesihlanu olwedlule, eMhlathuze Sports Complex.
Lesi siphekepheke somdlali wasesiswini singomunye wabadlali abasayiniswe yiBay ngewindi likaJanuwari, esuka kwiStellenbosch FC abesadlale isizini eyodwa nohhafu kuyona.
Lo mdlali oyisilomo kubalandeli beBay, kufana nokubuyela ekhaya kuyena ukubuya kuleli qembu kwazise udlale amasizini amabili kulona kusukela ngesizini ka-2022/23 ngaphambi kokujoyina iStellenbosch ngeka-2024/25.
Kulindeleke kubonakale amangwevu akhe nozakwakhe emdlalweni abazowudlala neSiwelele FC kwiNedbank Cup Last 32 ngeSonto ngo-6 ntambama, eDr Molemela Stadium, eBloemfontein.
“Siyazi ukuthi ubenesikhathi esihle naleli qembu kumasizini edlule, ulazi kahle iqembu, uyalwazi nosikompilo lalo. Ngikholwa wukuthi ukubuyiswa kwakhe eqenjini kube wumbono ophusile.
"Sesivele siqalile ukumbuyisela eqenjini, endleleni esidlala ngayo. Uzosebenzisa amava akhe ekuholeni abadlali abasebancane.
"Empeleni nje, silindele lukhulu kuyena. Kusukela efikile kula masonto amabili edlule usayibambe ngakho ejimini, ukhombisa izimpawu zokuba yilo mdlali esifuna abe nguye nesikholwa wukuthi uzolisiza kakhulu iqembu,” kusho uGabriel, oqeqesha ngokubambisana noPapi Zothwane kuleli qembu.
Ngaphandle kukaBarns, iNatal Rich Boys iphinde yaqinisa isikwati sayo ngokusayinisa umdlali wasemuva, uThembela Sikhakhane obegcine ukubonakala kuMaZulu FC ngesizini edlule.
Iphinde yasayinisa umgadli odabuka e-Uganda, uJoel Madondo, osuka kwiNsingizini Hotspurs yaseSwatini.
Leli qembu laseRichards Bay eligcine ukuhlulwa ngoNovemba 8, liguqiswa yi-Orlando Pirates kowandulela owamanqamu eCarling Knockout, ifomu yalo yakamuva kwiligi isilenze lazinza. Aliyazi induku emidlalweni emine yakamuva eliyidlalile kusukela ngoNovemba.