Owe-Orbit akanandaba namarekhodi ufuna ukuhlenga iqembu
Isithombe UMDLALI wasesiswini nokaputeni we-Orbit College, u-Atisang Batsi, ophule irekhodi likaShoes Moshoeu lokuba ngumdlali omdala oshaye igoli emdlalweni wePSL
Image: BACKPAGEPIX
UMDLALI wasesiswini nokaputeni we-Orbit College, u-Atisang Batsi, akafuni ukuyibeka eqhulwini eyokwephula amarekhodi kwiPremier Soccer League (PSL).
UBatsi (43) usephethe irekhodi lokuba ngumdlali omdala kunabo bonke oshaye igoli kwiPremiership. Wephule eleminyaka engu-18 ebeliphethwe nguJohn “Shoes” Moshoeu ongasekho, aliqopha ngo-2007 eneminyaka engu-41 egijima kuMaZulu FC bebhekene neKaizer Chiefs emdlalweni weBetway Premiership.
UBatsi uqophe irekhodi elisha eshaya igoli lesibili lokulinganisa ngesikhathi i-Orbit ibambana ngo 2-2 nePolokwane City kowePremiership ngoMgqibelo e-Old Peter Mokaba Stadium, ePolokwane.
Elinye igoli le-Orbit lishaywe nguSurprise Ralani ongomunye wabadlali abadala kuleli qembu laseNorth West.
“Okokuqala nje kungijabulisile ukushaya igoli lami lokuqala kwiBetway Premiership okuyisizini yami yokuqala ngidlala kulesi sigaba, obekuyigoli ebesilidinga kakhulu ukuthola iphuzu njengoba besilinganisa silandela ngemuva.
Bekungekho kodwa emqondweni wami ukuthi sengephule irekhodi likaShoes Moshoeu, okungomunye wabadlali bebhola engikhule ngibahlonipha ngibukela kubona ekukhuleni kwami,” kusho uBatsi.
“Nokho akungethusi ukwephula kwami la marekhodi engiwaphulayo ngoba vele ngifike esigabeni sePremiership sengimdala, sengingaphezulu kweminyaka yabadlali abanjengabo oShoes Moshoeu noSiyabonga Nomvethe okungabanye babadlali abadlale kwiPSL baze baba badala.
Njengoba umzimba wami usangivumela neqembu lami lisakholelwa kimina, angikuboni okungangivimba ekuqhubekeni nokwephula amanye amarekhodi ePSL.
Kodwa-ke okumqoka kakhulu kimina njengamanje ukwenza okusemandleni nozakwethu ukusiza iqembu ligcine indawo yalo kwiPremiership, lingabuyeli kwiMotsepe Championship ngoba sisebenze kanzima ukufinyelela lapha esikhona njengamanje.”
IMswenko Boys okumanje isendaweni ka-15 kwi-log yePremiership, ibalwa namaqembu asemshikashikeni wokusuka ezembeni.
Ngewindi likaJanuwari ingene emakethe yasayinisa uRalani, ongumdlali wasezinhlangothini osemnkantshubomvu obesethathe isinqumo sokubeka amakhokho emgibeni.
“USurprise ungomunye wabadlali abanamava esinabo eqenjini. Kusukela efikile ushumayela ivangeli lokuphokophela kubadlali, uyasikhuthaza sonke ekutheni sisebenze kanzima silwele ukuhlenga iqembu ezembeni.
Kumanje umoya wokuzethemba nokuphokophelela ukufela iqembu uyavunguza ekhempini, wenza sizitshele ukuthi nakanjani sizolivika izembe," kusho uBatsi.
IMswenko Boys ibuyela ensimini ngomdlalo weNedbank Cup Last 32 neLamontville Golden Arrows ngoMgqibelo ngo-6 ntambama, eKing Zwelithini Stadium, eMlaza.