UZwane ubona umvuzo ekuqoqeni amaphuzu kusakhanya
ISITOBHA saMaZulu, uKeagan Allen, sibanga ibhola noRomaric Outtara weMarumo Gallants emdlalweni weBetway Premiership eDr Molemela Stadium eBloemfontein, ngoMgqibelo ntambama
Image: Isithombe:BACKPAGEPIX
YIZE evuma ukuthi luselude ukhalo kodwa umqeqeshi waMaZulu FC, u-Arthur Zwane, ubona ezakhe zizowuthola umvuzo ekugcineni ngokuqhubeka nokusebenza ngokuzikhandla ekuqoqeni amaphuzu emidlalweni yeBetway Premiership.
AmaZulu awuqale ngonyawo oluhle umzuliswano wesibili wesizini, ebuya namaphuzu amqoka ekuhambeni ngokuguqisa iMarumo Gallants ngo 1-0 wegoli likaMlondi Mbanjwa ngoMgqibelo, eDr Molemela Stadium, eBloemfontein.
AmaZulu, asenqobe imidllalo emibili ilandelana kusukela zibuye ekhefini le-Africa Cup of Nations (Afcon), asendaweni yesine kwi-log yePremiership ngamaphuzu angu-30 emidlalweni engu-16. Abambene neKaizer Chiefs esendaweni yesithathu.
Ehlukaniswe ngamaphuzu amabili neMamelodi Sundowns esaqhwakele ngamaphuzu angu-32 ne-Orlando Pirates esendaweni yesibili ngamaphuzu alinganayo.
“Ngenxa yokuthi inkundla ebesidlalela kuyo (iDr Molemela) ibingasivumeli ukudlala ngendlela esiyejwayele, kudingeke sishintshe iqhinga ebeselisebenzisa.
"Siwatholile amathuba ambalwa okushaya amagoli kodwa asangawasebenzisa ngendlela efanele,” kusho uZwane.
“Kufanele ngibancome abadlali bami bakulwela ukuthola la maphuzu, bakhombise okukhulu ukuzinikela balwa ngakho konke abanakho, ekugcineni sabuya nawo amaphuzu.
"Kuzofanele siqhubeke sisebenze. Nakuba uhambo luselude kodwa sizowuthola umvuzo ekugcineni uma silokhu siqhubeka nokulwela ukuthola amaphuzu emdlaweni ngamunye esiwudlalayo.”
UZwane usho kanjena nje, Usuthu lusendaweni yesine kwi-log yePremiership okuyiyona umengameli walo, uSandile Zungu, akubeke kwacaca ngaphambi kokuqala kwale sizini ukuthi ufuna ukulibona leli qembu liqeda likuyona ekupheleni kwale sizini.
Ngakho ifomu yakamuva yakha inhlansi yethemba ngokufezeka kwalo lo mgomo, ikakhulukazi njengoba sekuqalwe umzuliswano wesibili wesizini.
Usuthu luzothola isivivinyo esiqinile njengoba luzobhekana ne-Orlando Pirates ngoLwesibili ngo-7.30 ebusuku, eMoses Mabhida Stadium, eThekwini.