U-Appollis uvuma eyokudlula emaphutheni
Isolezwe OYISIHLABANI se-Orlando Pirates, u-Oswin Appollis, owaphoqeleka ukuzakhela igama elihle emphakathini wangakubo kwazise uyise wayenegama elibi njengesigebengu esaziwayo
Image: BACKPAGEPIX
UKUKHULA elandelwa yigama elibi likayise owayeyisigebengu esaziwayo emphakathini, kwamphonsela inselelo yokuzakhela igama elihle, u-Oswin Appollis, njengoba namuhla esephenduke isihlabani sebhola esingaconsi phansi kubalandeli be-Orlando Pirates neBafana Bafana.
U-Appollis (23) odabuka eBishop Lavis, engelinye lamalokishi aseKapa, elidume ngobugebengu, waphekwa esikhungweni sabadlali se-Ajax Cape Town ngaphambi kokudlulela kwiSuperSport United.
Ngemuva kokubolekiswa yiSuperSport kwi-University of Pretoria, wadlala isikhashana kwiPretoria Callies esigabeni seMotsepe Foundation Championship.
Ugqame kwiPolokwane City kumasizini amabili edlule, asuke kuyo wajoyina iPirates ngaphambi kokuqala kwale sizini.
Njengamanje wenza ezibukwayo kuleli qembu laseSoweto, asefike wanqoba nalo izicoco ezimbili, okungeseMTN8 neCarling Knockout, waphinde wangena eqenjini leBafana ebeliyibambe kwi-Africa Cup of Nations (Afcon) muva nje.
“Impilo yayingelula ekukhuleni kwami kodwa ugogo nguyena owayehlale engikhuthaza nangenkathi sengiqalile ukudlala ibhola.
"Ukuya kwami kwiSuperSport ngisemncane kwangivula amehlo. Ngaqala ngahlala e-club house yayo kodwa ngokuhamba kwesikhathi ngafuna ukuzitholela inkululeko yokuzihlalela ngedwa.
"Ekuhlaleni kwami nabangani ababili ngazithola sengiphuma esandleni, sengidlebeleka namantombazane, ngisebenzisa imali budlabha ngaze ngagcina ngiphelelwa yinkontileka neSuperSport, ngabuyela ekhaya,” kusho u-Appollis, ekhuluma kwesinye seziqephu ze-Bucs Camp: Brotherhood edlala kumabonakude.
“Ekubuyeni kwami ekhaya ngahlala izinyanga eziyisithupha ngingalidlali bhola kodwa umama wangikhuthaza engitshela ukuthi ngizolithola iqembu.
"Iqiniso wukuthi ukuba angizilandelanga iziyalo engangizinikwa ekhaya ngaze ngangena esilingweni sokwenza izinto ezingalungile ngenxa yokuthi ngikhule ngibona izinto eziningi ebezenzeka endaweni.
"Ubaba wayeyisigebengu futhi abantu babezitshela ukuthi nami ngizolandela ezinyathelweni zakhe ngoba ngangiyingane egangile ebuncaneni bami kodwa umama wayelokhu ekholelwa ekutheni ngizokhula ngingafani nobaba.”
Lesi siphekepheke somdlali wasophondweni lwesokunxele esashaye amagoli amane, saba nesandla kwayisithupha emidlalweni engu-23 esiyidlalile, sesiphenduke enye yezinsika kweZimnyama ngesizini yaso yokuqala.
Leli qembu selinqobe izicoco zeMTN 8 ne-Carling Knockout kule sizini kanti lisabheke ukwengeza ezinye ezimbili, iBetway Premiership neNedbank Cup.
Uyisethenjwa nakwiBafana ezodlala kwiNdebe yoMhlaba yeFifa ezodlalelwa e-USA, eMexico naseCanada, ngoJuni.
“Kuningi engingakusho kodwa okukhulu kunakho konke, ngibona kakhulu ugogo ngokuma nami ngaso sonke isikhathi.
"Ngakho ngiyabakhuthaza nabadlule esimweni esithi asifane nesami, ukuthi bangalahli ithemba, bazophumelela," usho kanje u-Appollis.