IChiefs igudluze iBucs ihlula iMarumo koweligi

Marumo Gallants (0) 0

Kaizer Chiefs (0) 1

IKAIZER Chiefs iphinde yazibeka ethubeni lokufaka ukushisa buthule embangweni wesicoco seligi yeBetway Premiership igudluza izimbangi zayo, i-Orlando Pirates, kwi-log ngokushaya iMarumo Gallants izolo ebusuku, eDr Molemela Stadium, eBlomfontein.

IChiefs inqobe ngegoli likaGlody Lilepo alishaye esiwombeni sesibili. 

Amakhosi asendaweni yesibili kwi-log, angene enkundleni edinga ukunqoba ngenhloso yokufaka ingcindezi kwiPirates ebingaphezu kwawo.

IChiefs isinamaphuzu angu-30,, ilandelwe yiPirates enangu-29. IMamelodi Sundowns isaqhwakele ngangu-32.

IPirates, elahle ithuba lokubuyela esicongweni ngempelasonto edlule ibambana neSekhukhune United, isenalo elinye ithuba lokufaka ukushisa kwiSundowns esicongweni njengoba isasele ngemidlalo emibili. 

Ukubuyela emdlalweni, ngesiwombe sokuqala iChiefs iyona ethole amathuba angcono kuneGallants ebikhombisa ukuba yingozi uma iya phambili, okwenze zacishe zaya ekhefini kuyiyona ehamba phambili.

Emizuzwini embalwa zibuye ekhefini Amakhosi akhombise izinhloso zokushesha athole igoli, kodwa wala ukhasha unozinti weGallants uWashington Arubi evimba ibhola elibi ebelidudulwe nguLebogang Maboe ngaphandle kwebhokisi ngomzuzu ka-53.

Ukuqhubeka nokucindezela kwaMakhosi kugcine kuthele izithelo ngomzuzu ka-66 uLilepo eqhulula inguzunga yeshodi engaphandle kwebhokisi ayizwe ngendaba u-Arubi.

Ukuqhubeka kwaMakhosi nokuqoqa amaphuzu buthule kuwafake embangweni wesicoco seligi obekubukeka uzoba phakathi kwePirates neSundowns.  

Ngakolunye uhlangothi, iBahlabane Bantwa ebiyiqale kahle le sizini, ukuqhubeka nokulahla kwayo amaphuzu kuya ngokuya kuyisondeza esishozini sezembe njengoba isisendaweni ka-13 kwi-log ngaphezudlwana kwe-Orbit College, Chippa United neMagesi FC abavika izembe. 

Amakhosi abuyela ensimini ngomdlalo weCaf Confederation Cup neZesco United yaseZambia ngeSonto ngo-3 ntambama eMoses Mabhida Stadium, eThekwini.