AbeSundowns Ladies ethubeni lokuqoqa kumaHollywoobets Awards

KUBUKEKA kuzogiya iMamelodi Sundowns Ladies eminxeni eyahlukene yabaqokwe kumaHollywoodbets Super League Awards azoba ngeSonto.

Lo mcimbi wemiklomelo yabenze kahle ngesizini ka-2025 kwiHollywood Super League, uzobanjelwa eMidrand, eGoli. Uzovezwa bukhoma kwiSABC 1. 

ISundowns Ladies engompetha baka-2025 beSuper League, isikhonye amasizini ayisithupha elandelana kule ligi kazwelonke yebhola labesifazane eMzansi eyaqala ngesizini ka-2019/2020, yaxhaswa yiHollywoodbets ngo-2021.

Eminxeni emine kweyisithupha, kubukeka kuzokhonya iSundowns Ladies, ngaphandle kowe-Young Player of The Season noweGoalkeeper of the Season engaqokwanga kuyona.

KoweDefender of the Season, uKarabo Dlamini weSundowns ubanga noBoitumelo Rasehlo we-JVW FC noPrecious Seshweni we-TS Galaxy Queens. 

UNonhlanhla Mthandi ubanga noJessica Wade noRobyn Moodaly bee-JVW FC, uRefilwe Tholakale abange noLeandra Smeda weTS Galaxy Queens noBonolo Mokoma we-JVW FC. Kanti umqeqeshi uGodfrey “Godfather” Sapula uzobanga umklomelo noJanine Van Wyk we-JVW, noLucky Sibiya weGalaxy Queens.

USapula bekuyisizini yakhe yokuqala ethathe izintambo zokuqeqesha kuJerry Tshabalala owaxoshwa ngezinsolo zokungaziphathi kahle. 

KoweYoung Player of the Season, kudlana imilala uBonolo Mokoma we-JVW, u-Okuhle Sithole weDurban Ladies noRethabile Ncobo we-University of Pretoria. KoweGoalkeeper of the Season, kuzobanga uDineo Magagula weGalaxy Queens, uKaylin Swart we-JVW noKebotseng Moletsane we-University of Pretoria. 

“IHollywoodbets izibophezele ekuthuthukiseni ibhola labesifazane. Inhloso yethu wukuqinisekisa ukuthi abadlali besifazane, abaqeqeshi nonompempe bathola ukuhlonishwa nezinsiza kusebenza ezibafanele,” kusho uMenzi Ngcobo, ongumdidiyeli omkhulu wabaxhasi kwaHollywoodbets.

ULydia Monyepao, oyisikhulu esiphezulu seSafa uthe:“Igebe liya ngokuya livaleka phakathi kwamaqembu alesi sigaba seHollywoodbets Super League. Lokho kufakazelwa yingcindezi efakwe ngamanye amaqembu kompetha beligi, iMamelodi Sundowns. Kuwuphawu lokuthuthuka kwale ligi kule minyaka kusukela ekusungulweni kwayo."

Isiyonke iminxa yeHollywoodbets Super League Awards: 

Top Goal Scorer: Leandra Smeda - TS Galaxy Queens (22 goals)

Referee of the Season: Jean Ndebele: Ntanganendzeni Muagari; Palesa Motaung

Assistant Referee of the Season: Nolitha Mhlomi; Samkelo Ngwane; Nothando Zulu

Young Player of the Season: Bonolo Mokoma - JVW FC; Okuhle Sithole - Durban Ladies; Rethabile Ncobo - University of Pretoria

Coach of the Season: Godfrey Sapula - Mamelodi Sundowns; Janine Van Wyk - JVW FC; Lucky Sibiya - TS Galaxy Queens

Goalkeeper of the Season: Dinoe Magagula - TS Galaxy Queens; Kaylin Swart - JVW FC; Kebotseng Moletsane - University of Pretoria

Defender of the Season: Karabo Dlamini - Mamelodi Sundowns Ladies; Boitumelo Rasehlo - JVW FC; Precious Seshweni - TS Galaxy Queens 

Midfielder of the Season: Jessica Wade - JVW FC; Nonhlanhla Mthandi - Mamelodi Sundowns Ladies; Robyn Moodaly - JVW FC

Player of the Season: Leandra Smeda - TS Galaxy Queens; Refilwe Tholakele Mamelodi Sundowns; Bonolo Mokoma - JVW FC