AbeMidlands abanazinhlelo zokufudukela eThekwini

PHEZU kokuba iMidlands Wanderers inqume ukudlalela yonke imidlalo yayo yasekhaya eMpumalanga Stadium, eHammarsdale, kodwa usihlalo uVincent “Masenti” Myeni, uveze ukuthi abanazo izinhlelo zokufudukela eThekwini. 

Ngemuva komdonsiswano phakathi kwaleli qembu elidlala kwiMotsepe Foundation Championship noMasipala uMsunduzi ngodaba lokunakekelwa kwenkundla, iHarry Gwala Stadium, eMgungundlovu, kubukeka sebuphelile ubuhlobo.

NgoMsombuluko, iWanderers ikhiphe isitatimende iqinisekisa ukuthi isizoyidlalela eMpumalanga Stadium yonke imidlalo yasekhaya. 

Lokhu kulandela incwadi ebhalwe nguMasipala uMsunduzi, wazisa leli qembu ukuthi sekufanele liyikhokhele iHarry Gwala Stadium, ngeke lisayisebenzisa mahhala njengoba bekwenzeka phambilini.

Kule ncwadi (leli phephandaba elinayo) kuvela uhla lwezindleko zokusetshenziswa kwale nkundla, kusukela ekuqashweni kwayo, i-VIP room, kuya ezibanini ezisetshenziswa enkundleni emidlalweni yasebusuku (flood light). Kufinyelela esambeni esingu-R38 070.00 sekuhlangeniswe zonke izindleko.

“Le ncwadi esiyithole kuMasipala uMsunduzi isazisa ngalezi zindleko okudingeka sizikhokhe ukusebenzisa iHarry Gwala. Yiyo kanye eyenze sabona kufanele ukuthi singabe sisazihlanganisa nokusebenzisa le nkundla ngoba kuyacaca ukuthi asisadingeki kuyona.

"Ngoba besesivele siqalile ukusebenzisa iMpumalanga Stadium, sibe sesibona ukuthi asisale sesiqhubeka unomphela nokusebenzisa yona kuyona yonke imidlalo yethu esisalele kule sizini,” kusho uMyeni. 

“Lokhu kokuthi kumele sikhokhe le mali engaka ekubeni amanye amaqembu abesebenzisa le nkundla phambilini, iMaritzburg United neRoyal AM, bebengakhokhiswa, kusimangazile kodwa futhi akwangasithusa kakhulu ngoba bese kuvele kucaca ukuthi asemukelekile kahle ekusebenziseni iHarry Gwala.

Kwaqala ngokuthi basizibe bengaphenduli izincwadi esibabhalela zona, bangasisikela utshani, saze sathatha isinqumo sokuzisikela thina ngaphambi komunye umdlalo okwakumele siwudlale.”

Ngaphambi kokuqala kwesizini edlule ka-2024/25, iMaritzburg United ithathe isinqumo sokufudukela eThekwini, yashintsha negama yaba iDurban City ngenxa yokungaboni ngaso linye noMsunduzi. 

Nokho, lesi sikhulu simile ekutheni phezu kwalesi simo, abekho nhlobo ezinhlelweni zokufudukela eThekwini njengeqembu.

“Cha, ngeke sisuke eMgungundlovu. Iqembu lethu ngelaseMgungundlovu, lingumsinsi wokuzimilela khona. 

Ngisho nesikhungo sethu, iMidlands Academy, sizinze khona. Ngakho asikho nhlobo ezinhlelweni zokufudukela eThekwini.

Isivumelwano sethu kuphela noMasipala waseThekwini ngesokusebenzisa inkundla kuphela," kusho uMyeni.

IMidlands esidlale imidlalo engu-15 kule sizini, izodlala ne-The Bees namuhla ngo-3.30 ntambama eMpumalanga Stadium.

Imizamo yokuthola uhlangothi lukaMasipala uMsunduzi ayiphumelelanga njengoba okhulumela lo Masipala, uNtobeko Mkhize, kuze kwashaya isikhathi sokushicilela engalubambi ucingo engaphenduli nomyalezo athunyelwe wona ngoWhatsApp. 

Imidlalo yeMotsepe Foundation Championship: 

Namuhla: 

Baroka FC v Highbury (Global Stadium, 3.30pm); Midlands Wanderers v The Bees (Mpumalanga Stadium, 3.30pm); Upington City v Black Leopards (Mxolisi Dicky Jacobs Stadium, 3.30pm); Milford FC v Leicesterford City (Mhlathuze Sports Complex, 3.30pm); Kruger United v Hungry Lions (Kanyamazane Stadium, 3.30pm)

NgoLwesihlanu:

Casric Stars v Cape Town City (Kanyamazane Stadium, 3.30pm); Gomora United v Venda FC (Malamulele Stadium, 3.30pm)