OweSafa eThekwini ukhwele wadilika kumahlubuka enqoba ukhetho
UMAZWI Mkhize ephahlwe ngunobhala uZama Buthelezi nephini lakhe elisha, uMlungisi Hlophe, ngemuva kokhetho lweSafa eThekwini obeluseMarine Parade, eThekwini, ngoMgqibelo
Image: SITHUNYELWE
UKHWELE wadilika kulabo abachaze njengamahlubuka amjikele esiswini njengotshwala baphenduka izimbangi zakhe okhethweni, uMazwi Mkhize, odle umhlanganiso wabuyela esikhundleni sokuba ngumengameli weSouth African Football Association (Safa) Ethekwini ihlandla lesibili.
UMkhize ubuyele ngo-elethu kulolu khetho obeluseMarine Parade Hotel, eThekwini, ngoMgqibelo. Uthole amavoti angu-18, kwathi imbangi yakhe ebiyiphini lakhe, uMadoda Mnomiya, yathola amathathu kuphela.
UMkhize ubevele ethwelwe ngeqoma kwazise ngaphambi kokhetho bekuvele ukuthi wesekwa yiningi lama-Local Football Association (LFA) kwangu-22 angaphansi kwesifunda iSafa Ethekwini.
Kwezinye izikhundla, uMlungisi Hlophe uphumelele ekubeni yiphini likaMkhize, uJabu Luthuli wavotelwa kwesokuba yiphini lesibili, uNhlakanipho Mkhize wabuyela kwesokuba ngumgcinimafa, kwathi uZama Buthelezi wabuyela kwesokuba nguNobhala.
“Lokhu okwenzekile bekufanele kwenzeke. Ukushaya abantu ngo 18-3 yisibalo esikhulu leso. Ngijabule kodwa ngiphatheke kabi ngoba bengicabanga ukuthi laba bantu ebesiqale nabo sisebenza sizobuyela njengoba sinjalo kodwa-ke uma sekukhona abahalayo abanamagilo angaphandle sebefuna ukungenela ukhetho kuthande ukuba yinkingana.
Kodwa-ke ayikho into esingayenza abantu bonke banelungelo lokuthi bangenele ukhetho, nokho lokhu kube muncu.
Okwesibili yile ndaba yalama-LFA alawulwa ngaphandle, angalawulwa yithina bathathe izinto abazitshelwa ngaphandle beze nazo la. Manje umuntu acabange ukuthi ngoba nakhu ungusihlalo we-LFA useziphethe, bathatha izinqumo bengakhulumile nama-LFA abo.
Awukwazi ukuthi ungabhalela iSafa kuzwelonke i-LFA yakho ingazi. Uwathathaphi lawo mandla ngoba awuzimele wena, umele isakhiwo. Yisona okumele nihlale naso phansi nixoxe bese uyenza-ke,” kusho uMkhize.
Ube esekugcizelela ukuthi usazoqhubeka nokusebenza kanzima nethimba akhethwe nalo ukuletha intuthuko yebhola esifundeni seSafa Ethekwini.
UMkhize waqokwa kulesi sikhundla sokwengamela iSafa eThekwini ngo-2021 ngemuva komdonsiswano weminyaka eyisikhombisa nowayeyimbangi yakhe, u-Alpha Mchunu, kwaze kwafikiswana ezinkantolo.
Kusukela athatha izintambo, lesi sifunda siphumelele ukuthola inqwaba yabaxhasi bemiqhudelwano yebhola okubalwa neyezikole. Lokhu ngenye yezinto ezimakhele ugazi njengoba esebuyele ihlandla lesibili ekwengameleni lesi sifunda esinama-LFA amaningi KwaZulu-Natal ukwedlula zonke ezingu-11 ezikhona.