Bazoxolisa bonke abasigxekayo - oweChiefs

UMQEQESHI weKaizer Chiefs, uCedric Kaze, ukhwele wadilika kwabangamhloniphi, abamgxekayo nabambukela phansi yena nozakwabo, uKhalil Ben Youssef, wathi ekupheleni kwesizini inkukhu iyobe isinqunywe umlomo. .

UKaze ubekhuluma nabezindaba ngemuva komdlalo weBetway Premiership ezakhe eziwunqobe ngo 1-0 ziguqisa iLamontville Golden Arrows ngoLwesibili ebusuku eFNB Stadium, eNasrec. 

Kusukela uKaze noBen Youssef bethathe izintambo zokuqeqesha kwiChiefs ngemuva kokushiya kukaNasreddine Nabi ngoSepthemba, ikhombisa ukuvuka emaqandeni nakuba ikhona imidlalo ephunyule kuyona amaphuzu kungafanele. Amakhosi asendaweni yesithathu kwi-log yePremiership ngamaphuzu angu-27 emidalweni engu-14. Ahlukaniswe ngamabili neMamelodi Sundowns esesicongweni ngawu-29. 

IChiefs isahlulwe kanye emidlalweni engu-14 yePremiership esayidlalie, kanti ayikangenelwa yigoli emidlalweni eyishumi ukubala nowangoLwesibili.

Kumanje leli qembu laseSoweto lisesigabeni samaqoqo kwiCaf Confederation Cup.

Nokho, phezu kwalokho kusekhona abasashaya amakhala ngokulungela kukaKaze noBen Youssef ukuhola leli qembu ngokugcwele njengoba besengamabamba azoshayela umkhumbi waMakhosi kuze kuphele isizini.

“Anginawo umuzwa wokungathenjwa lapha eqenjini kodwa nginokwesekwa okukhulu kusukela kubaphathi kuya kubadlali, nabo bonke ozakwethu ethimbeni labaqeqeshi. 

Kodwa kwesinye isikhathi nginokubona sengathi kunabanye abangaphandle abazama ukwakha izinto ezingekho. Kukhombisa ukungahloniphi uma abantu bekhuluma ngesikhundla somqeqeshi ekubeni esekhona umqeqeshi osekuleso sikhundla. 

Abanye balabo baqeqeshi abathi bafuna lesi sikhundla, bathi bazowinela leli qembu izicoco kodwa uma uthi ubheka umlando wabo akukho zicoco asebeke baziwina.

Kwesinye isikhathi abantu bakhuluma ngalabo baqeqeshi bengawazi ngisho amagama abo. 

Siyayazi into esiyenzayo, sineziqu zokuqeqesha, futhi ekupheleni kwesizini ngiyafunga ngiyagomela ukuthi sizohlangana nalabo abasigxekayo futhi bonke bazobe sebexolisa ngokusigxeka kwabo,” kusho uKaze. 

UKaze ukhuluma kanjena nje, umqeqeshi uDylan Kerr, ukhulume kwi-podcast iSoccerbeat ukuthi iChiefs angayiwinisa iligi. 

Yize Amakhosi ebalwa namaqembu amathathu aphezulu kwi-log kodwa lo mqeqeshi ukubeke kwacaca ukuthi okumqoka kubona wukuhlala emshungwini wabanga isicoco kuze kuphele isizini.

“Ngesizini edlule asingenanga kwi-Top 8, ngakho okumqoka kithina kule sizini wukuthi siqhubeke nokuba phakathi kwamaqembu aphezulu kwi-log. Sizolwa kuze kuphele isizini, sibone ukuthi siphelelaphi," kusho uKaze.

Amakhosi azodlala neZesco United yaseZambia kowesigaba samaqoqo kwiCaf Confederation Cup ngeSonto ngo-3 ntambama eLevy Mwanawasa Stadium, eNdola, eZambia.