UDiaz ethubeni lomlando wamagoli okhethekile kwi-Afcon

YIZE eguqile kweyandulela owamanqamu e-Africa Cup of Nations (Afcon) amaqembu ezimbangi zikaBrahim Diaz, uVictor Osimhen noMohamed Salah, kodwa kubukeka zisenethuba lokumdlisela ogageni embangweni womklomelo wamagoli kulo mqhudelwano osongwa ngeSonto. 

EzikaDiaz, iMorocco, zidlulele kowamanqamu ngokuguqisa iNigeria ngo 4-2 sekukhahlelwa amaphenathi kowandulela owamanqamu ngoLwesithathu eTangier Grand Stadium, eMorocco.

i-Egypt iguqiswe yiSenegal ngo 1-0 komunye umdlalo owandulela owamanqamu. IMorocco isizodudulana neSenegal kowamanqamu ngeSonto ngo-9 ebusuku ePrince Moulay Abdellah Stadium, eRabat. 

Ngaphambi kowamanqamu, i-Egypt izobhekana neNigeria ngoMgqibelo ngo-6 ntambama eMohhamed V Stadium, eCasablanca, kubangwa indawo yesithathu nendodo yethusi. 

UDiaz uzihola phambili ngamagoli kwi-Afcon njengoba eseshaye amahlanu emidlalweni eyisithupha. Ulandelwa ngu-Osimhen waseNigeria noSalah wase-Egypt ngamane umdlali ngamunye. U-Ademola Lookman waseNigeria unamathathu. 

Nakuba kubukeka uDiaz enethuba lokukhala emuke nomklomelo wamagoli kodwa laba badlali abathathu basenethuba lokuhlohla amanye amagoli kulo mdlalo wangoMgqibelo. 

Ngokushaya amagoli emidlalweni emihlanu, uDiaz ufice irekhodi lenkakha leminyaka engu-57  elabekwa yinkakha yaseGhana esadla amabele, u-Osei Kofi, eyaliqopha nge-Afcon ka-1968 e-Ethiopia. 

Lo mdlali ogijima kwiReal Madrid yaseSpain, yize ezalelwe eSpain wadlala nasemaqenjini amancane esizwe akuleliya lizwe, kodwa ngo-2023 wathatha isinqumo sokujoyina iqembu lesizwe laseMorocco okuyizwe okuzalwa kulo uyise. 

Uma kungenzeka uDiaz afinyelele esibalweni samagoli ayisithupha emdlalweni wamanqamu  neSenegal ngeSonto, angangena ohlwini lwabadlali abayisikhombisa asebeke bafika bafika kulesi sibalo emqhudelwaneni owodwa.

Kubona kubalwa uHassan El-Shazly wase-Egypt (1963), Laurent Pokou wase-Ivory Coast (1968), Ad-Diba wase-Egypt (1957), Salif Keita waseMali (1972), Rashidi Yekini waseNigeria (1994), Kalusha Bwalya waseZambia (1996), noShaun Bartlett waseNingizimu Afrika (2000).

UNdaye Mulamba waseDemocratic Republic of Congo (DRC) nguyena osaphethe irekhodi le-Afcon lokushaya amagoli amaningi emqhudelwaneni owodwa njengoba ahlohla ayisishiyagalolunye kwi-Afcon ka-1974.

Ulandelwa nguPokou wase-Ivory Coast (1970) noVincent Aboubakar waseCameroon (2021) ngayisishiyagalombili, uHossam Hassan wase-Egypt noBenni McCarthy waseNingizimu Afrika ngayisikhombisa kwi-Afcon ka-1998 eBurkina Faso.