Uthathwa njengowamagqubu oweSenegal ne-Egypt kwi-Afcon
U-ILIMAN Ndiaye weSenegal ongomunye wabadlali abamqoka leli qembu elizothembela kubona emdlalweni wanamuhla owandulela owamanqamu e-Afcon ne-Egypt
Image: BACKPAGEPIX
U-OMAR Marmoush we-Egypt ongomunye wabadlali abamqoka okubhekeke athwalise kanzima izitobha zeSenegal namuhla ebusuku kowandulela owamanqamu e-Africa Cup of Nations
Image: BACKPAGEPIX
IMIDLALO yanamuhla eyandulela owamanqamu we-Africa Cup of Nations (Afcon) ibaluleke ngezindlela ezihlukene emaqenjini, kubadlali nakubaqeqeshi ababheke ukujabulisa izindimbane zabalandeli emazweni abawaqeqeshayo.
Senegal v Egypt, eTangier Grand Stadium, namuhla ngo-7pm:
Ngaphandle nje kokuhlabahlosa kwemidlalo emibili yanamuhla eyandulela owamanqamu e-Africa Cup of Nations (Afcon), umdlalo weSenegal ne-Egypt ufaniswa nowamagqubu ngezizathu ezahlukene.
ISenegal izotholana phezulu ne-Egypt emdlalweni wokuqala owandulela owamanqamu.
Zihlangana namuhla nje zazigcine ukuhlangana kowamanqamu e-Afcon ka-2021 eCameroon emdlalweni owanqotshwa yiSenegal iguqisa i-Egypt ngo 4-2 sekukhahlelwa amaphenathi.
Ukunqoba kweSenegal kulowo mdlalo wamanqamu kwakusho ukuphela kweshobolo leminyaka laleli qembu elalingakaze lisiphakamise isicoco se-Afcon.
Ngakho umdlalo wanamuhla wala maqembu ufana nowamagqubu, ikakhulukazi njengoba ne-The Pharaohs ilwela ukubuyisa isithunzi sayo kulo mqhudelwano eyagcina ukuwunqoba ngo-2010.
ILions of Teranga kwi-Afcon yanonyaka iholwa nguPape Thiaw othathe izintambo ku-Aliou Cisse ngoDisemba 2024. UCisse wayehola leli qembu ngesikhathi linqoba isicoco ngo-2021 kodwa wazidalela amazinyo abushelelezi ehluleka wukusivikela ngo-2024 e-Ivory Coast iphuma emzuliswaneni we-Last 16.
Ngesifanayo nakwi-The Pharaohs eholwa nguHossam Hassan othathe izintambo zokuqeqesha ngoFebhuwari 2024.
Le nkakha eyayiyisibabuli somgadli waleli qembu lesizwe ngezikhathi zayo, inenselelo yokubuyisa isithunzi se-The Pharaohs ngokuyinqobela i-Afcon ngemuva kweminyaka engu-15.
Nigeria v Morocco, ePrince Moulay Abdellah Stadium, namuhla ngo-10pm:
INigeria ekhombise izimpawu zokuba yiqembu eliyingozi kusukela kuqale lo mqhudelwano, izothola isivivinyo esizocacisa ukuthi ikulungele yini ukuwina i-Afcon.
Kwi-Afcon ka-2024 e-Ivory Coast, iSuper Eagles yafinyelele kowandulela owamanqamu yaguqiswa yi-Ivory Coast. Lokhu kuyinselelo yokuthi kulokhu yenze kangcono.
Ngakolunye uhlangothi, i-Atlas Lions engosokhaya kwi-Afcon yanonyaka ngaphansi komqeqeshi uWalid Regragui, okunguyena kuphela umqeqeshi wase-Afrika uphumelele ukufaka leli qembu kowandulela owamanqamu kwiNdebe yoMhlaba ka-2022 eQatar.
Ngaphandle kwalokho, okwenza lo mdlalo ubhekwe ngabomvu yifomu yokushaya amagoli kubadlali bawo womabili la maqembu okuyibona abasazihola phambili kwi-Afcon yanonyaka.
UBrahim Diaz weMorocco uzihola phambili ngamagoli amahlanu, ulandelwa nguVictor Osimhen weNigeria noMohamed Salah ngamagoli amathathu ngamunye. Kubhekwe ngabomvu ukuthi laba badlali bazokwazi yini ukuhlohla amagoli nasemdlalweni wanamuhla kubonakale ukuthi ngubani ozogcina ekhala emuka nomklomelo wokushaya amagoli amaningi.