OwoMkhambathi akanankinga nokutomula iChiefs kwiNedbank

OYIPHINI lomqeqeshi kuMkhambathi FC, uNkongiphile “Dimco” Ntinga, uveza ukuthi bazokwemukela ukuqhathwa yinanoma yiliphi iqembu emzuliswaneni we-Last 32 yeNedbank Cup. 

Angu-32 amaqembu azongena esigqokweni uma sekuqhathwa azogadulisana kwiNedbank Cup. Kuwona kukhona angu-16 adlala kwiBetway Premiership, ayisishagalombili ayibamba kwiMotsepe Foundation Championship nayisishiyagalombili agijima ezinhlakeni zeSouth African Football Association (Safa). 

UMkhambathi odlala kwiSafa KwaZulu-Natal ABC Motsepe League, usemaqenjini asuka ezinhlakeni zeSafa. 

Amanye yi-FC Cardinals yaseFree State, i-SSU M17 FC yaseGauteng, iTshakhuma Tsha Mazivhandila yaseLimpopo, iLuthuli Brigades yaseMpumalanga, i-Jacksa Spears yaseNorthern Cape, i-Army Rockets yaseNorth West, neqembu laseWestern Cape elisazoqinisekiswa. 

Ukuqhathwa kwamaqembu azoqhuthana kowe-Last 32 yeNedbank, kuzovezwa bukhoma kwiSupersport 202 ngo-6 kusasa kusihlwa. 

“Isifiso sethu ukuthi siqhathwe neqembu elisezingeni lethu ngokwesigaba (Motsepe League) ukuze sikwazi ukuzikala ngesingakulindela kumaPlay-Offs eMotsepe League kazwelonke uma sigcina ngokuphumelela ukunqoba iligi yesifundazwe. 

"Singakuthokozela futhi nanokuqhathwa neqembu elidlala kwiMotsepe Championship. 

"Kodwa-ke uma sekudonswa sizokwamukela noma yiliphi iqembu esingase sizithole siqhathwa nalo noma ngabe elePSL.

"Ngisho kungaba yiKaizer Chiefs imbala noma yiliphi-ke nje elinye iqembu lePremiership, singakwemukela ukuqhathwa nalo. Ngikholwa wukuthi lokhu kungabakhuthaza, kubaqinise abadlali bethu ukudlala nelinye lamaqembu alesi sigaba esikhulu,” kusho uNtinga, oyiphini likaXolani Khumalo. 

“Ukudlala neqembu elikhulu lePremiership kunobuhle nobubi ngasohlangothini lwemigomo yeqembu ngoba kwesinye isikhathi abadlali beqembu elinjengelethu elidlala kulesi sigaba seMotsepe League, bangazithola sebenokuzethemba okweqile uma kungenzeka bahlule iqembu lePremiership kwiNedbank. Lokho kungenza bethathe izinto kancane emidlalweni yeMotsepe League okuyiyona emqoka kakhulu kithina njengoba silwela ukunqoba kulesi sigaba, sikhuphukele kwesingaphezulu seMotsepe Championship.”

INedbank yiwona mqhudelwano webhola womkhumulajezi okwazi ukunika amaqembu aseMzansi adlala ezigabeni zama-amesha ingqayizivele yethuba lokudlala namaqembu asesigabeni esikhulu sePremiership. Abadlali abebengaziwa bathola ithuba lokuziveza kwazise imidlalo ivezwa bukhoma kumabonakude. 

UMkhambathi okuyiwe ekhefini lamaholide kaDisemba uzihola phambili kwi-log kaStream B weKZN ABC Motsepe League, ubalwa namaqembu asembangweni weligi yalesi sigaba.