IMorocco nenselelo yeshobolo leminyaka kwi-Afcon
U-BRAHIM Diaz weMorocco ongomunye wabadlali abamqoka leli qembu lesizwe elithembele kubona kwi-Africa Cup of Africa
Image: BACKPAGEPIX
NJENGEQEMBU elingosokhaya kwi-Africa Cup of Nations (Afcon), iMorocco inengcindezi yokuhamba ibanga elide kulo mqhudelwano njengoba idlalela phambi kwezinkumbi zabalandeli bayo.
Ngaphandle kwaleyo ngcindezi, leli qembu lesizwe linenye inselelo yokuqeda isikhwakhwalala seminyaka engu-49 lagcina ukudla umhlanganiso kulo mqhudelwano.
IMorocco efinyelele kowandulela owamanqamu ngokuguqisa iCameroon ngo 2-0 kuma-quarterfinal, izotholana phezulu neNigeria kowandulela owamanqamu ngoLwesithathu ngo-10 ebusuku ePrince Moulay Abedllah Stadium, eRabat.
Lo mdlalo uzokwandulelwa ngowokuqala owandulela owamanqamu ozoba uphakathi kweSenegal ne-Egypt ngo-7 ebusuku eTangier Stadium, e-Agadir.
I-The Atlas Lions eyayigcine ukunqoba isicoco se-Afcon ngo-1976, ifinyelela kowandulela owamanqamu wanonyaka nje, yayigcine ngo-2004 eTunisia ukufinyelela kulesi sigaba somqhudelwano lapho yaguqiswa khona yi-Tunisia ngo 2-1.
Umqeqeshi waleli qembu laseMorocco, uWalid Regragui, ngemuva kokuba ezakhe zifinyelele kowandulela owamanqamu ngokuguqisa iCameroon kuma-quarterfinal, uxwayise ngokubala amachwane engakachanyiselwa.
“Sidinga ukuqhubeka nokulwa umdlalo nomdlalo. Asikakenzi lutho okwamanje,” kusho uReagragui.
“Kuyingqophamlando lokhu okwenzekayo njengoba iMorocco sekuyiminyaka engu-22 yagcina ukufinyelela kowandulelwa owamanqamu.
"Kusifanele ukufinyelela kulesi sigaba somqhudelwano. Esikudingayo nje ukuhloma amakhanda phansi siqhubeke nomsebenzi siphinde siqophe omunye umlando.”
URegragui usaphethe irekhodi lokuba ngumqeqeshi wokuqala wase-Afrika emlandweni weNdebe yoMhlaba yeFifa ohole iqembu lase-Afrika lafinyelela kowandulela owamanqamu walo mqhudelwano. Uma kungenzeka agcine ngokuyinqoba i-Afcon, uyobe eseziqophele omunye umlando njengomqeqeshi wokuqala oqede ishobolo leminyaka lokwehluleka kwaleli qembu laseMorocco ukunqoba lo mqhudelwano wase-Afrika.
Ukuhlabahlosa nokubhekwa ngabomvu komdlalo we-The Atlas Lions neSuper Eagles, kuhambisana nefomu kaBrahim Diaz osalokhu eqhubekile nokuhlohla amagoli kusukela uqalile lo mqhudelwano we-Afcon.
UDiaz osemabhukwini eReal Madrid yaseSpain, owazalelwa khona eSpain kodwa uyise okungowaseMorocco, uqale ukudlalela iqembu lesizwe laseMorocco ngo-2024.
Lo mdlali wasesiswini ophinde ayibambe ophondweni lwesokudla, nguyena osazihola phambili ngamagoli amahlanu kwi-Afcon, kanti useziqophele umlando ngokuba ngumdlali wokuqala kulo mqhudelwano oshaye inethi emidlalweni emihlanu ilandelana.