IMidlands iqinisa isikwati ngabanamava ePremiership
UTHEMBELA Sikhakhane wodumo kuMaZulu FC, uphakathi kwabadlali okulindeleke bethulwe yiMidlands Wanderers edlala kwiMotsepe Foundation Championship
Image: BACKPAGEPIX
EMIZAMWENI yokusuka ezembeni, iMidlands Wanderers, isiqinise isikwati sayo ngabadlali abanamava okudlala esigabeni seBetway Premiership njengoba ivivela umzuliswano wesibili wesizini ka-2025/26 yeMotsepe Foundation Championship.
IWanderers engomakoti kwiChampionship okuyiwe ekhefini le-Africa Cup of Nations (Afcon) ibalwa namaqembu avika izembe kulesi sigaba, kuvela ukuthi isisayinise uJabulani “JB” Ncubeni noThembela Sikhakhane, okungabadlali abazakhele igama emaqenjini ePremiership kumasizini ambalwa edlule.
UNcubeni odlale emaqenjini okubalwa kuwona iMaritzburg United (esiyiDurban City), iLamontville Golden Arrows, AmaZulu FC neRoyal AM, ujoyine iMidlands esebuya kwiSinenkani FC edlala kwiSafa Eastern Cape ABC Motsepe League.
USikhakhane owayegijima kwiLamontville Golden Arrows, Orlando Pirates naMaZulu FC, ubengasenalo iqembu. Uhlukane noSuthu nyakenye, emuva kwamasizini ayisithupha edlala kulona.
Ngokomthombo weSolezwe osondelene kakhulu neMidlands, uNcubeni odabuka eNhlazatshe, eMgungundlovu, uqale ukuziqeqesha naleli qembu laseMgungundlovu, ngaphambi komqhudelwano i-SA Duma Foundation Tournament obudlalelwa eRoyal Ridge, eMaqongqo, ezinsukwini ezedlule. Kuthiwa yilapho egeze igilo khona ithimba labaqeqeshi beMidlands eliholwa nguVincent “Masenti” Myeni ngengcwenga yebhola ayidlalile kulo mqhudelwano.
“Ngingasho ngingangabazi ukuthi uNcubeni uphakathi kwabadlali abazokwethulwa maduze yiMidlands esanda kubasayinisa kuleli windi likaJanuwari, ithimba labaqeqeshi nosihlalo weqembu uqobo, uMasenti (Myeni) bahlabeke umxhwele ngendlela adlale ngayo kwi-SA Duma Foundation Tournament ekhombisa ukuthi lisekhona ibhola kuyena.
"Kanti-ke noThembela Sikhakhane obekuMaZulu ngesizini edlule, uphakathi kwabadlali okulindeleke bethulwe yileli qembu maduze nje,” kusho umthombo.
UMyeni wenqabile ukudalula amagama abadlali abazoqinisa ngabo njengoba belwa nokuvika izembe.
"Sizobethula abadlali abasha ngasekupheleni kwesonto noma ngesonto elizayo. Kodwa ngifuna ukusho ukuthi likhona isiko leqembu, siyathembela futhi siyakholelwa kubadlali abasebancane. Yebo, sizokwengeza ngabanesipiliyoni kodwa sizoxuba," usho kanje.
IMidlands ingena emakethe nje, isanda kulahlekelwa ngabadlali bayo abathathu abamqoka okunguZwelihle Phewa, uSmiso Gumede noNkosivumile “Mageba” Zulu, abasayiniswe yiMbabane Highlanders AM FC yaseSwatini, ephethwe nguShauwn “MaMkhize” Mkhize.
Abafana Bebatha okuyiwe ekhefini besendaweni ka-14 kwi-log yeChampionship, bazovula unyaka ngokusonga umzuliswano wokuqala wesizini ngomdlalo wasekuhambeni neCasric Stars eSolomon Mahlangu Stadium, KwaMhlanga, ngoJanuwari 21.