UWildschutt noGlenrose bashaye into ecokeme kowe-World Cross Country
U-ADRIAAN Wildschutt oshaye into ecokeme ebangeni lika-10k kowe-World Athletics Cross Country Championships e-USA, ngempelasonto
Image: BACKPAGEPIX
U-ADRIAAN Wildschutt noGlenrose Xaba bakhiphe unyawo ebangeni lika-10km emjahweni we-World Athletics Cross Country Championships eTallahassee, e-United States of America (USA), ngoMgqibelo.
Laba bagijimi abebeseqenjini labangu-28 abebemele iNingizimu Afrika kowe-World Athletics Cross Country, bebevele bethwelwe ngeqoma kulo mjaho ngenxa yamava abo nokwenza kahle emijahweni yakamuva ehlukene abayigijimile.
UWildschutt uqede endaweni ka-13 ngesikhathi esingu-29:32 ebangeni lika-10km kwabesilisa. Wenze okungaphezulu kokwenziwa ngabagijimi baseMzansi kulo mjaho okunguShadrack Hoff owathatha indawo ka-15 kulo mjaho ngo-1996 ugijinyelwa eStellenbosch, noStephen Mokoka naye owalala endaweni ka-15 ePunta Umbria, eSpain, ngo-2011.
UWildschutt (27) ongowokudabuka eCeres, eWestern Cape kodwa ozinze e-USA, uphethe amarekhodi amane aseNingizimu Afrika emabangeni ka-3000m, 5000m, 10 000m nele-World Half Marathon yebanga lika-42km aliqophe kwiValencia Half-Marathon, eSpain, ngo-Okthoba nyakenye.
“Bengingathanda ukuqeda ku-Top 10 kodwa njengoba sazi sonke kunzima kakhulu laphaya. Ngakho ngijabule kakhulu ngokuqala unyaka ngale ndlela. Ngizothatha isikhathi sokuphumula isonto, ngiye ekhaya eNingizimu Afrika ngiyolungisa i-visa yami bese ngikhempa isikhashana ukulungiselela eminye imijaho ezayo engizoba nayo,” kusho uWildschutt ohole iqembu labesilisa laqeda endaweni yesishiyagalolunye kulo mjaho.
Ngakolunye uhlangothi, uGlenrose ophethe amarekhodi ehlukene aseNingizimu Afrika emijahweni ka-10km nelika-42km leCape Town Marathon kwabesifazane, uthathe indawo ka-34 kwiCross Country Championships ebangeni lika-10km kwabesifazane ngesikhathi esingu-34:51. Usize iqembu labesifazane laqeda endaweni yesishiyagalolunye kulo mjaho ebangeni lika-10km.
“Ngijabule kakhulu ngendawo engiqede kuyona kulo mjaho, ngenze okusemandleni kodwa umzila bewunzima kakhulu.
"Ngijabule kodwa ukuthi senze kakhe kakhulu ngawuqeda umzila nozakwethu,” kusho uGlenrose oqeqeshwa uViolet Semenya, oganene noCaster Semenya.
Emijahweni yamanye amabanga, iqembu lakuleli le-relay ebangeni lika-4x2km ebelibophele uLuna Munnik, uKarabo More, uChristopher Swart noCarina Viljoen, liqede ibanga lika-8km ngesikhathi esingu-23:04 phezu kokuqala kahle.
Eqenjini lika-Under 20 labesifazane ebangeni lika-6km, uLara Stander uqede endaweni ka-27 ngesikhathi esingu-21:15, kwathi uBenkosi Maqwara wenza kahle ku-Under 20 wabesilisa ebangeni lika-8km, eqeda endaweni ka-43 ngesikhathi esingu-26:20.