Uvumbuke kwiCape Town City ohlukane neGalaxy

ICAPE Town City isikhombise ukungasinisi mahleza ngezinhloso zayo zokulwela ukubuyela esigabeni seBetway Premiership ngokusayinisa umgadli obukhali, uDzenan Zajmovic. 

UZajmovic (31) ujoyina iCity nje usanda kwehlukana neqembu lase-Iran, iZoba Ahan, abelijoyine ngaphambi kokuqala kwale sizini esuka kwi-TS Galaxy. 

Lo mgadli odabuka eBosnia osayine kwiGalaxy ngesizini edlule, ufike kwezwakala kwiPremiership. Uhlohle amagoli angu-11, wakha amabili emidlalweni engu-28.

Ngesikhathi ebhakuzisa inethi kwiGalaxy, kusabalale amahlebezi okuthi ugaqelwe yizinkunzi zePremiership okuyiKaizer Chiefs, Orlando Pirates neMamelodi Sundowns.

Nokho, kube nebohlololo ngenkathi esevumbuka eqenjini lase-Iran njengoba esekhuza ibuya eMzansi ejoyina iCity ekwiMotsepe Foundation Championship kulandela ukugawulwa kwayo yizembe ngesizini edlule. 

Ngemuva kokugawulwa yizembe kwiPremiership, leli qembu laseKapa eliphethwe nguJohn Comitis, liqashe uJan Vreman waseNetherlands kwesokuqeqesha.

Ukulahlekelwa yinqwaba yabadlali okubalwa kubona uDarren Keet, Thabo Nodada, Haashim Domingo noThamsanqa Mkhize kuphoqe ukuba lingene emakethe. Liqinise sikwati ngabanye abanamava okudlala kwiPremiership okubalwa kubona uNjabulo Ngcobo, uKeagan Dolly noSifiso Ngobeni nomgadli uWalter Bwalya osuka kwi-JS Kabylie yase-Algeria.

Nakuba i-The Citizens iyiqale ngebatha isizini ibalwa namaqembu aseduze kwasemsileni we-log yeMotsepe Championship, kodwa ukuthola kwayo umgqigqo ngaphambi kwekhefu le-Africa Cup of Nations (Afcon) kuyenza ibalwe nangase abange isicoco seChampionship. 

Iqede unyaka isendaweni yesine kwi-log ngamaphuzu angu-22 emidlalweni engu-14. Yehlukaniswe ngamaphuzu amahlanu neMilford FC eqhwakele ngamaphuzu angu-27 emidlalweni eyisibalo esilinganayo. 

I-The Citizens izobuyela ensimini ngemuva kwekhefu le-Afcon ngomdlalo wasekuhambeni neGomora United e-TUT Stadium, ePitoli, ngoJanuwari 23.