U-Timm usabheke ukubuyela kwiPremiership

UMDLALI wasesiswini, uMiguel Timm, akaboni sekuphelile ngaye esigabeni esikhulu sebhola eMzansi, iBetway Premiership, njengoba esejoyine iCape Town City edlala kwiMotsepe Foundation Championship. 

UTimm (33) usayiniswa yiCity nje, ubesaqede izinyanga eziyisithupha kuphela esemabhukwini eSekhukhune United abeyijoyine ngaphambi kokuqala kwale sizini esuka kwi-Orlando Pirates adlale kuyona amasizini amathathu. 

Lo mdlali wasesiswini ungomunye wabadlali abanegama abasanda kusayiniswa yileli qembu laseKapa, elilokhu liqhubeka nokuqinisa isikwati salo ngabadlali abanohlonze kuleli windi likaJanuwari, lokubhalisa nokuhwebelana ngabadlali.

Bekungakapholi maseko isayinise umgadli onohlonze waseBosnia, uDzenan Zajmovic, ogqame kwi-TS Galaxy ngesizini edlule eyishayela amagoli amqoka iqeda endaweni yesihlanu kwi-log yePremiership.

Ngaphandle kukaTimm noZajmovic, leli qembu laseKapa eliqeqeshwa nguJan Vreman waseNetherlands, ligqishe ngabanye abadlali abanegama okubalwa kubona uKeagan Dolly noNjabulo Ngcobo bodumo kwiKaizer Chiefs. 

“Ngiyakuqonda ukuthi isho ukuthini ibheji yaleli jezi kubalandeli,” kusho uTim kwi-website yeCape Town City. 

“Ngiyazi ukuthi abalandeli bathanda abadlali abalwela iqembu. Ngakho ngiyathembisa ukuthi uma ngigqoka leli jezi, ngizozinikela ngakho enginakho enkundleni ngoba kuningi engisazimisele ngokukwenza esigabeni esiphezulu sebhola.

"Maduze ngizoba ngizoba neminyaka engu-34 ngakho izinkumbulo zami zokugcina ebholeni ngifuna kube ngezinhle.

"Singakwazi ukukhuphukela kwiPSL (Premiership) uma singasebenza ngokubambisana njengeqembu.”

I-The Citizens egawulwe yizembe kwiPremiership ngesizini edlule, isikhombisile ukuthi ishabashekela ukubuya ngokushesha kulesi sigaba esiphezulu njengoba kuyiwe ekhefiini le-Africa Cup of Nations (Afcon) isendaweni yesine kwi-log yeMotsepe Championship, yehlukaniswe ngamaphuzu amahlanu neMilford FC esaqhwakele kwi-log yalesi sigaba.

Izovula unyaka ngokuqeda umzuliswano wokuqala wesizini ka-2025/26 yeChampionship ngokubhekana neGomora United ngoJanuwari 23, e-TUT Stadium, ePitoli.