Ligqishe ngabanohlonze elaseMzansi kowe-World Cross Country

UMQEQESHI kaGlenrose Xaba, uViolet Semenya, uyalethemba iqembu laseNingizimu Afrika elizomela elakuleli kwi-World Cross Country Championships ezobanjelwa eTallahassee, e-United States of America (USA), kusasa. 

USemenya ungomunye wabaqeqeshi abazoba yingxenye yeqembu labagijimi abangu-28 baseNingizimu Afrika abazobe beyibambe kulo mjaho ezizobe zidlana imilala ebangeni lika-10km kwabesilisa nabesifazane, u-8km ka-Under 20 wabesilisa, u-6km ka-Under 20 wabesifazane, ne-relay ka-4x2km wezinsephe.  

“Sineqembu eliqinile, ikakhulu kuleli labezinsephe (seniors). Sino-Adriaan Wildschutt ongumpetha we-SA Half Marathon nabagijmi bethu abasezingeni eliphezulu abazinze e-United States.

Sinaneqembu eliqinile le-relay elixubile (abesilisa nabesifazane) engingangabazi ukuthi lizokwenza kahle kulo mjaho. Uma bezethemba, nathi sibethemba, angingabazi ukuthi iqembu lethu lizokwenza kahle,” kusho uSemenya. 

UGlenrose owenze ezibukwayo ngonyaka odlule u-2025, edla umhlanganiso emijahweni eyahlukene ka-10km, usonge unyaka ngokulala isithupha kwi-Valencia Marathon yebanga lika-42km eValencia, eSpain, ngoDisemba nyakenye. 

Uzohola iqembu labesifazane ku-10km kwi-World Cross Country Champioships, anethemba lokwenza kahle kulo mjaho azobe ewugijima okwehlandla lesihlanu.

“Ngizokwenza konke okusemandleni kodwa ngifuna ukuwuthokozela umjaho ngiphinde ngiwuqede ngomfutho.

"Angijimanga kakhulu ngoba bengivele ngiqatha. Ngiphumulile uDisemba wonke ngakho sengikulungele ukubuyela futhi ngiyogijima.

"Singabagijimi baseNingizimu Afriika sesiqala ukwenza kahle kakhulu emijahweni yezinga lomhlaba, okuyinto engikhuthazayo,” kusho uGlenrose. 

Kwi-4x2km relay exubile, uLuan Munnik, uChristopher Swart, uKarabo More noCarina Viljoen, yibona abathwele amathemba eNingizimu Afrika. 

Ku-10km kwabesilisa amathemba oMzansi akuJayde Rosslee, ozinze khona e-USA, novale isikhala sikaKabelo Mulaudzi oyinsephe ka-10km ongeke abe yingxenye yalo mjaho ngenxa yokulimala.

Ngaphandle kukaRosslee, abanye abagijimi bakuleli okubhekeke benze kahle ku-10km wabesilisa, uBennet Seloyi, uSanele Masondo ozinze e-USA, uChris Mhlanga, noMsawenkosi Mnisi.

Imijaho yeWorld Athletics Cross Country Championships izoqala ngo-4.45 ntambama ngomjaho weMixed Relay, kulandele owabesifazane ka-Under-20 ngo-5.20 ntambama kuthi owabesilisa ka-Under 20 ube ngo-5.55 ntambama.

Kuzobe sekugxilwa emijahweni yabadala lapho kuzoqala khona owabesifazane ngo-6.35 ntambama, kuvalwe ngowabesilisa ngo-7.20 ebusuku.