UMayo ubona okungcono kwiChiefs kule sizini

U-PATRICK Mayo, owayengumgadli weKaizer Chiefs, ukholwa wukuthi leli qembu lingakwazi ukuqeda isizini libalwa namathathu aphezulu kwi-log yeBetway Premiership phezu kokuba kukhona abalandeli abanganeme ngendlela elidlala ngayo. 

IChiefs ihlukane nomqeqeshi, uNasreddine Nabi ngo-Okthoba, izintambo yaziphosela uKhalil Ben Youssef noCedric Kaze abebengamaphini alo mqeqeshi odabuka eTunisia. 

Amakhosi ahlulekile ukungena kwi-Top 8 ngesizini edlule, akhombise izimpawu zokuba yiqembu elingcono ngaphasi kobuholi bukaBen Youssef noKaze abazobamba kuze kuphele isizini.

Phezu kokulahla amaphuzu emidlalweni emibili yePremiership ngaphambi kwekhefu le-Africa Cup of Nations (Afcon), ebambana neChippa United ne-TS Galaxy, Amakhosi aqede unyaka esendaweni yesine kwi-log ngamaphuzu angu-24 emidlalweni engu-13.

Ahlukaniswe ngamane ne-Orlando Pirates esesicongweni ngawu-28 emidlalweni engi-12. 

Ngaphandle kwalokho, iChiefs izibekisele indawo esigabeni samaqoqo kwiCaf Confederation Cup, lapho ikleliswe khona kuGroup D ne-Al Masry, iZamalek okungamaqembu ase-Egypt, neZESCO United yaseZambia. 

“Ngokwami, iChiefs isakhombise ukuba yiqembu elingcono kunangesizini edlule uma ubheka indlela ebidlala ngayo ngesizini edlule ngalesi sikhathi.

"Bekuvele kuzothatha isikhashana ukuthi abadlali bajwayele ngokushesha indlela abaqeqeshi abakhona njengamanje, uBen Youssef noKaze, abafuna iqembu lidlale ngayo.

"Yize bebeyingxenye yethimba labaqeqeshi likaNabi kodwa iqiniso ukuthi uBen Youssef noKaze baneyabo indlela abafuna iqembu lildlale ngayo,” kusho uMayo.

“Basadinga ukukhuphula izinga ekushayeni amagoli njengoba besashaye angu-13 kwiligi emidlalweni engu-13.

"Kanti futhi nasodongeni lwasemuva abakavusizi amagoli amanigi uma ubheka ukuthi basanganelwe ngayisithupha, okusabenza babe yiqembu elisangenelwe yisibalo esincane samagoli ngemuva kwePirates esangenelwe ngamahlanu.

"Ngakho okubalulekile ukuthi balwele ukuqhubeka nomgqigqo ngomzuliswano wesibili wesizini.

"Lona luselude ukhalo kodwa angingabazi ukuthi iChiefs yakule sizini ngeke yehluleke ukungena kwi-Top 8. Empeleni nje ngiyibona iqeda phakathi kwamaqembu amathathu aphezulu kwi-log.”

Amakhosi asalelwe yimidlalo emibili ngaphambi kokusonga umzuliswano wokuqala wesizini. Azovula unyaka ngomdlalo wasekhaya neLamontville Golden Arrows kwiPremiership ngoJanuwari 20, eFNB Stadium, eNasrec.

Ngemuva kwalowo mdlalo, azobhekisa amabombo eZambia eyodudulana neZESCO ngoJanuwari 25.