Angase avumbuke kwi-Orbit obesegaxe amakhokho emgibeni

KUNGENZEKA abuyele enkundleni uBradley "Surprise" Ralani obemenyezelwe njengomqeqeshi omusha weqembu elidlala kwi-kwiSafa Northern Cape ABC Motsepe League. iGaza United, njengoba kuvela ukuthi uzama inhlanhla kwi-Orbit College eyibamba kwiBetway Premiership.  

URalani (38) odle ngomjiko nejubane ezimpondweni, uzakhele igama emaqenjini okubalwa kuwo iCape Town City neMamelodi Sundowns kumasizini ambalwa edlule. Ngemuva kokuhlukana neHungry Lions edlala kwiMotsepe Foundation Championship ngo-Okthoba nyakenye, umemezele ukuthi usewaphanyeka emgibeni amakhokho. Kuphele unyaka odlule eseqashwe njengomqeqeshi omusha weGaza.

Nokho kuvele ukuthi uRalani usewathintithile amakhokho, wayoziqeqesha ne-Orbit ngenhloso yokuthola inkontileka ngaphansi kweso elibukhali lomqeqeshi uPogiso Makhoye okuqinisekisile ukufika kwalo mdlali izolo.

“Yebo, uSurprise uyaziqeqesha nathi. Usanda kusijoyina nje ezinsukwini ezimbalwa sibuyile njengoba sivela ekhefini elifishane silungiselela ukuqala kwemidlalo yePSL.

Kodwa okwamanje kuseva kakhulu ukuthi ngingaphawula ngokuziqeqesha kwakhe ngoba akakasayini lutho nathi,” kushaya ngamafuphi uMakhoye ethintwa yiSolezwe izolo. 

Uma kwenzeka uRalani egcina ngokusayina kwiMswenko Boys, uzojoyina abanye abadlali asebekhulile kuleli qembu, okubalwa kubona u-Atisang Batsi oneminyaka engu-43 ongukaputeni waleli qembu, noRamahlwe “Rama” Mphahlele (35). 

Leli qembu eliboleke noMonnapule Saleng kwi-Orlando Pirates, lisanda kusayinisa noBen Motshwari osuka kuMaZulu FC ngomunye wabadlali elihlose ukuthi balisize livike izembe kwiPremiership.

URalani ongomunye wabadlali abaphekwa esikhungweni sebhola sodumo, iStars of Africa, udlale isikhathi eside emaqenjini ehlukene eDenmark naseSweden ngaphambi kokubuyela eMzansi ukuzojoyina iCity.

Unguyise ka-Emile Witbooi (17) ongumdlali wasesiswini kwiCape Town City naseqenjini lesizwe lika-Under 20, Amajita.