Ithemba leCosafa selikwiBafana neMozambique
UKAPUTENI weBafana Bafana, uRonwen Williams noTeboho Mokoena, okubhekwe amava abo ekuhambeni ibanga kwaleli qembu kwi-Africa Cup of Nations eMorocco
Image: BACKPAGEPIX
UKUDLULELA kwi-Last 16 we-Africa Cup of Nations (Afcon) kweBafana Bafana nokufinyelela kweMozambique kulo mzuliswano, kubuyisa ithemba ngokumeleka kwesifunda seCouncil of Southern Africa Football Associations (Cosafa) emizuliswaneni elandelayo kulo mqhudelwano.
IBafana izotholana phezulu neCameroon ngeSonto ngo-9 ebusuku e-Al Medina Stadium, eRabat, eMorocco.
IMozambique izodudulana neNigeria ngoMsombuluko ngo-9 ebusuku eFez Stadium, eFez. Kungokokuqala emlandweni we-Afcon ukuthi iMozambique yedlule esigabeni samaqoqo kusukela yaqala ukudlala kulo mqhudelwano ngo-1986.
Kusukela kwasungulwa i-Afcon ngo-1957, impumelelo isalokhu ingabakhwekazi emaqenjini ase-Afrika eseNingizimu angaphansi kwesifunda seCosafa esinamaqembu angu-14.
IBafana yilona qembu elingaphansi kweCosafa elaqopha umlando ngokunqoba i-Afcon ngo-1996, kwalandela iZambia ngo-2012. Lokhu kwenza kube yiwona kuphela kuze kube manje amaqembu angaphansi kweCosafa asaqukule le ndebe yase-Afrika eminyakani engu-67 kwasungulwa i-Afcon.
Sekungumlando ukuthi emaqenjini ayisikhombisa abemele iCosafa kwi-Afcon yanonyaka eseMorocco, amahlanu awo - okubalwa neChipolopolo - aphume ekuseni esigabeni samaqoqo, njengoba sekusele iBafana ne-The Mambas.
IBafana eqeqeshwa ngumakadebona, uHugo Broos onqobe i-Afcon ngo-2017 neCameroon, kulindelwe lukhulu kuyona njengoba kweyango 2023 e-Ivory Coast ibuye nendondo yethusi ilala isithathu.
Ngakolunye uhlangothi, i-The Mambas eqeqeshwa uChiquinho Conde othathe izintambo zokuqeqesha leli qembu ngo-2019, kubhekwe ngabomvu ukuthi angakwazi yini ukwenza ezibukwayo naleli qembu kulesi sigaba somqhudelwano.
Kuleli qembu kubhekwe amava okaputeni waleli qembu, u-Elias “Domingues” Pelembe (42) okunguyena umdlali omdala kunabo bonke kwi-Afcon yanonyaka, nozakwakhe ekugobeni i-Super Eagles enomlando omude kulo mqhudelwano.
KwiBafana kubhekwe amava abadlali okubalwa kubona abeMamelodi Sundowns okungunozinti uRonwen Williams, uTeboho Mokoena noKhuliso "Sailor" Mudau, asebengomakadebona emidlalweni yebhola lase-Afrika.