UShongwe iyamkhathaza eyamava abeChiefs kweyeligi neye-Caf
ABAQEQESHI beKaizer Chiefs abasabambile, uCedric Kaze noKhali Ben Youssef, inkakha yaleli qembu engabaza amava abo ngokumelana nengcindezi yemidlalo yomqhudelwano weCaf neyeligi ngasikhathi sinye
Image: BACKPAGEPIX
OWAYENGUNOZINTI weKaizer Chiefs, uWilliam “Cool Cat” Shongwe, okhuthazwa yinqubekela phambili esakhonjiswe yileli qembu kule sizini, ukholwa wukuthi ukuhamba kwalo ibanga emqhudelwaneni weCaf Confederation Cup kungenza umehluko ekulifakeni umfutho wokwenza kahle nasemidlalweni yeligi.
IChiefs inenselelo yokugcina umgqigqo wayo weligi eqede ngawo unyaka nokuqhubeka nokwenza kahle nakwiConfederation Cup njengoba isifinyelele esigabeni samaqoqo salo mqhudelwano.
“Kuyinto enhle kunanoma yiliphi iqembu ukubamba iqhaza emiqhudelwaneni yezwekazi (Caf). Lokho kuyaliqinisa iqembu ekubhekaneni nezinselelo zokudlala emiqhudelwaneni yalolu hlobo,” kusho uShongwe.
IChiefs ehlulekile ngesizini edlule ukuqeda phakathi kwamaqembu ayisishiyagalombili aphezulu kwi-log yeBetway Premiership, isakhombise izimpawu zokuba yiqembu elizokwenza kangcono kule sizini.
Amakhosi kuyiwe ekhefini le-Africa Cup of Nations (Afcon) esendaweni yesine kwi-log yePremiership ngamaphuzu angu-24 emidlalweni engu-13, ehlukaniswe ngamane ne-Orlando Pirates esahlezi phezulu ngawu-28.
Nokho uShongwe unokukhathazeka ngethimba labaqeqeshi baleli qembu laseSoweto, abona sengathi alizukuba nawo amava anele okubhekana nenselelo yokumelana nengcindezi yokuhamba ibanga kwiConfederation Cup ngasikhathi sinye nokwenza kahle kwiligi.
Ngemuva kokushiya komqeqeshi, uNasreddine Nabi ngo-Okthoba, izintambo zithathwe ngabebengamaphini akhe, uKhali Ben Youssef noCedric Kaze, abazoqhubeka kuze kuphele isizini.
Amakhosi aku-Group D weConfederation Cup neZamalek ne-Al Masry okungamaqembu ase-Egypt, neZesco United yaseZambia.
Emidlalweni emibili asayidlalile kulesi sigaba samaqoqo ahlulwe yi-Al Masry adlala ngokulingana neZamalek, kanti azodlalela ekuhambeni neZesco ngoJanuwari 25.
“Umbuzo usekutheni azokwazi yini ukuphumula ngokwanele phakathi kwemidlalo yeCaf neyeligi (Premiership) ngoba ukuhamba kakhulu akubaniki abadlali ukuphumula okwanele ekubhekaneni nomdlalo olandelayo.
"Ngakho kuzoba kumqeqeshi (weChiefs) ukuqeqesha abadlali ngendlela efanele, okungezinye zezinto ezimqoka ukuzilawula njengomqeqeshi.
"Anginaso kodwa isiqiniseko sokuthi abaqeqeshi beChiefs banamava okubhekana naleso simo, engikholwa wukuthi kuzoba yinselelo," kusho uShongwe.
Nokho, phezu kwalokho, uShongwe ubona Amakhosi ekhombisa izimpawu zokuba yiqembu elingcono kule sizini.
Amakhosi azobuyela ensimini ngemuva kwekhefu le-Afcon ngomdlalo wasekhaya wePremiership neLamontville Golden Arrows ngoJanuwari 20, eFNB Stadium, eGoli.