Kuvuka upelepele ogqokweni iBafana ibhekana neCameroon kowe-Afcon
ABADLALI beBafana Bafana bephakamisela phezulu umqeqeshi, uHugo Broos, ngemuva kokuthola indodo yethusi kwi-Africa Cup of Nations ngo-2024
Image: Isithombe:BACKPAGEPIX
UKUBHEKNA kweBafana Bafana neCameroon kunanoma yimuphi umqhudelwano akubuzwa ukuthi kuhlale kuvukuza izinkumbulo nesasasa kubathandi bebhola bawo womabili la mazwe kungakhathaleki ukuthi hlobo luni lomqhudelwano ngenxa yomlando wala maqembu esizwe.
IBafana iqhathwe ne-Indomitable Lions kowe-Last 16 ye-Africa Cup of Nations (Afcon) ozodlalelwa e-Al Medina Stadium, eRabat, eMorocco, ngeSonto ngo-9 ebusuku.
Lo mdlalo ubaluleke ngokufanayo kuwo womabili la maqembu esizwe ngezindlela ezahlukene.
IBafana, eyayisanda kuthola inkululeko yokubuyela ebholeni lamazwe omhlaba, yadlala umdlalo wayo wokuqala wobungani neCameroon ngoJulayi ka-1992 eKings Park Stadium, eThekwini, yanqoba ngo 1-0 wegoli likaDoctor “16 V” Khumalo.
Ngemuva kwaleyo ngqophamlando yomdlalo, la maqembu asehlangane izikhawu eziyisishiyagalolunye.
UMQEQESHI uHugo Broos ejabula nabadlali beCameroon emuva kokuwina i-Africa Cup of Nations behlula i-Egypt eGabon ngo-2017
Image: Isithombe:BACKPAGEPIX
Kulezo zikhawu iBafana yiyona ekhonyile inqoba amahlandla amathathu, badlala ngokulingana amahlandla amahlanu kuyo yonke imiqhudelwano.
ICameroon isahlule iBafana kanye okwakuwumdlalo wobungani. Lokhu kuwubufakazi bokuthi iCameroon ayiliboni kwiBafana phezu kwempumelelo yalo ebholeni lase-Afrika.
Ngesikhathi la mazwe egcina ukududulana ngoMashi ka-2016 kowokuhlungela i-Afcon ka-2017, zabambana ngo 0-0.
Okuzoshubisa ubutha kakhulu emdlalweni wangeSonto wukuthi iBafana iqeqeshwa nguHugo Broos owawina indebe ye-Afcon epheka i-Indomitable Lions eGabon ngo-2017. Kwakungokwesihlanu iCameroon iwina le ndebe.
CHRISTIAN BASSOGOG
Image: Isithombe:BACKPAGEPIX
Eqenjini le-Indomitable Lions eladla isicoco se-Afcon ngo-2017 noBroos basekhona abadlali abasayibambile kuyona. Kulaba badlali kubalwa nokaputeni uChristian Bassogog okungangatshazwa ukuthi uyazi ukusuka nokuhlala indlela yokudlala yalo mqeqeshi waseBelgium osevuse iBafana.
Kuzobe kungokokuqala uBroos ebhekana neCameroon eseqeqesha iBafana. IBafana kubhekwe ukuthi yenze okungcono kunokwango 2024 lapho yabuya khona nendodo yethusi kwi-Afcon eyayidlalelwa e-Ivory Coast. Lo mqeqeshi usevele ufake iBafana kwiNdebe yoMhlaba ka-2026.
“Uyazi, eqinisweni, ngicabanga ukuthi esengikwenze kwiNingizimu Afrika kungcono kunengikwenze neCameroon. Ngakho ngijabule kakhulu ngomsebenzi esengiwenze lapha (kwiBafana) kunalowo esengiwenze neCameroon,” kushaya ngamafuphi uBroos, ekhuluma nabezindaba ngemuva kokuqhathwa kwezakhe neCameroon kowe-Last 16.