OwePolokwane ukhuthazwa nguzakwabo okwi-Afcon
OYISIKHWISHIKHWISHI somdlali wePolokwane City, uBonginkosi Dlamini, ukhuthazwa wukubona omunye uzakwabo eqenjini lesizwe, iBafana Bafana
Image: BACKPAGEPIX
UMDLALI wasohlangothini lwesokudla kwiPolokwane City, uBonginkosi Dlamini, ukuthatha njengesikhuthazi kuyena ukubona omunye wozakwabo agijima naye kuleli qembu, uThabang Matuludi, eseqenjini lesizwe iBafana Bafana eliyibambe kwi-Africa Cup of Nations (Afcon) eqhubekayo eMorocco.
UMatuludi ongumdlali wasemuva ngakwesokudla, okuyindawo ayibanga noKhuliso Mudau, ukwiBafana esanda kwedlulela kwi-Last 16 ngokuguqisa iZimbabwe ngo 3-2 ngoMsombuluko emdlalweni wokugcina ka-Group B.
Nakwi-Afcon ka-2023 eyayise-Ivory Coast, iPolokwane yayimelwe ngu-Oswin Appollis ojoyine i-Orlando Pirates ngaphambi kokuqala kwesizini.
“Ukubona umdlali onjengoThabang (Matuludi) engidlala naye eqenjini elilodwa eseqenjini leBafana Bafana elikwi-Afcon kuyangikhuthaza kakhulu, cishe nabanye ozakwethu enginabo eqenjini.
Lokhu kuyinkomba yokuthi akudingeki ukuthi uze udlalele elinye lamaqembu amakhulu aseGauteng ukuze ubizwe kwiBafana Bafana, inqobo nje uma wenza kahle eqenjini lakho uyalithola ithuba eqenjini lesizwe,” kusho uDlamini waseMhlongo Farm, ngaseMondlo.
Lesi sikhwishikwishi somdlali wasohlangothini lwesokudla esibuye siyibambe nasohlangothini lwesokunxele, singomunye wabadlali abagqamile kwiPolokwane kule sizini.
Sishaye amagoli amabili emidlalweni engu-16 kule sizini. La magoli abalwa nasize leli qembu lathola amaphuzu aholele ekutheni lihlale endaweni yesithupha kwi-log yeBetway Premiership ngaphambi kwekhefu le-Afcon.
“Yisizini yami yesibili lena ngidlala esigabeni seBetway Premiership, ngakho sengizinze ngokwanele manje, sengiyiqonda kangcono inselelo yokudlala kulesi sigaba.
Isifiso sami manje ukukhula njengomdlali webhola elikhokhelayo, ngithole amathuba angcono. Kungangijabulisa kakhulu ukuzibona nami ngigqoke ijezi leqembu lesizwe, iBafana Bafana, ngelinye ilanga.
Ngesizini edlule ngidlale no-Oswin (Appollis) obesevele edlala eqenjini lesizwe, obekungikhuthaza nakho,"kusho uDlamini.
IRise and Shine enqobe imidlalo emibili kwemithathu yePremiership eyidlalile ngaphambi kwekhefu le-Afcon, izobuyela ensimini ngomdlalo wasekuhambeni neDurban City ngoJanuwari 25 eChatsworth Stadium, eThekwini.