Ziyaqhakaza izinsephe ezibhekwe kwi-Afcon

UKUSHAYWA kwamagoli emqhudelwaneni we-Africa Cup of Nations (Afcon) oqhubekayo eMorocco, kubukeka kusahamba njengoba bekulindelekile kubalandeli nabathandi bebhola kwazise abadlali abasazihola phambili ngamagoli yilabo ababhekiwe vele ngokwezinga labo namaligi abadlala kuwona e-Europe. 

Phakathi kwabadlali abasahamba phambili ngamagoli kulo mqhudelwano we-Afcon osungene esontweni lesibili, kubalwa kubo uRiyad Mahrez we-Algeria, u-Ademola Lookman weNigeria, uLassine Sinayoko weMali, u-Amad Diallo we-Ivory Coast, uBrahim Diaz weMorocco, u-Elias Achouri weTunisia, noNicolas Jackson weSenegal.

Kwi-Afcon ka-2023 eyayise-Ivory Coast, umhlanganiso wadliwa ngu-Emilio Nsue we-Equatorial Guinea ngamagoli amahlanu. 

RIYAD Mahrez (Algeria): 

Ngaphambi kwemidlalo yayizolo, nguyena obezihola phambili ngamagoli amathathu. Ungomunye wabadlali abanegama nababhekiwe kulo mqhudelwano we-Afcon ngokwezinga namagalelo abo. 

UMahrez (34) ozakhele igama kwiManchester City kumasizini edlule, usegijima kwi-Al-Ahli SFC yaseSaudi Arabia. Ngomunye wabadlali abenze kahle kwi-Afcon kule minyaka embalwa edlule nokwenza abalwe nababhekiwe ekuqhubekeni nomgqigqo wokudla isicoco sokushaya amagoli kulo mqhudelwano omkhulukazi wase-Afrika. 

ADEMOLA Lookman (Nigeria): 

Lo mgadli ogijima kwi-Atalanta edlala kwiSerie A yase-Italy, ungomunye wabadlali ababhekiwe ekuthwaleni iNigeria kwi-Afcon yanonyaka, kwazise leli qembu lesizwe libalwa nayizimfivilithi emqhudelwaneni wanonyaka njengoba kweka-2023 ladlala owamanqamu ne-Ivory Coast eyayingosokhaya, laguqa ngo 2-1. 

ULookman (28) osashaye amagoli amabili, kubhekeke ukuba aqhubeke nomgqigqo wakhe nozakwabo uVictor Osimhen njengoba iSuper Eagles isivele izibekisele indawo kwi-Last 16 yize isazodlala ne-Uganda namuhla ngo-6 ntambama. 

Amad Diallo (Ivory Coast): 

Lo mgadli osemncane ogijima kwiManchester United edlala kwi-English Premier League, ungomunye wabadlali i-Ivory Coast ethembele kubona kwi-Afcon yanonyaka njengeqembu elivikela isicoco. 

Nakuba bedlale ngokulingana neCameroon ngeSonto, komunye wemidlalo kaGroup F kodwa uDiallo ushaye elinye lamagoli abalulekile kulo mdlalo ophele zibambene ngo 1-1.

Ifomu kaDiallo (23)  ayikhombise kule midlalo emibili esadlaliwe, kulindeleke iphinde ibonakale emdlalweni wanamuhla neGabon ongowokugcina kaGroup F eMarrakech Stadium, eMorocco, namuhla ngo-9 ebusuku. 

Lona ngumdlalo i-The Elephants edinga ukuwunqoba ukuze iqiniseke ukuthi iyadlulela kwi-Last 16. 

Mohamed Salah (Egypt): 

Lesi sihlabani seLiverpool esiye kwi-Afcon kunezinkulumo zokungenami kwaso kuleli qembu lase-England elingompetha abavikela isicoco sePremier League, bekubhekwe ukuthi sifike silithwale iqembu laso lesizwe lase-Egypt kulo mqhudelwano.

Nebala emidlalweni emibili yokuqala, uSalah useshaye amagoli amabili ambeka ohlwini lwabadlali abasahamba phambili ngamagoli njengamanje kwi-Afcon. I-The Pharaohs esivele izibekisele indawo ku-Last 16 we-Afcon, isonge isigaba samaqoqo ngokubhekana ne-Angola izolo kusihlwa.