UMbokazi nomyalezo omqoka ngaphambi kokawafawafa neZimbabwe
ISIQONGQWANE sasemuva kwiBafana Bafana, uMbekezeli Mbokazi, sifuna bafele enkundleni njengoba bezobhekana neZimbabwe emdlalweni wokusonga uGroup B eMarrakesh Stadium, eMorocco, namuhla
Image: BACKPAGEPIX
OYISITOBHA seBafana Bafana, uMbekezeli “TLB”’ Mbokazi, ukhomoza ozakwabo ekukhipheni amangwevu emdlalweni wabo wokugcina wesigaba samaqoqo kwi-Africa Cup of Nations (Afcon) abazowudlala neZimbabwe namuhla.
Kulindele kusiphuke izidindi emdlalweni weBafana neZimbabwe wokusonga u-Group B we-Afcon ozodlalelwa eMarrakesh Stadium, eMorocco, ngo-6 ntambama.
IBafana inengcindezi yokuwunqoba lo mdlalo wanamuhla ne-The Warriors ukuze izibekisele indawo kowe-Last 16 kulandela ukuguqiswa kwayo yi-Egypt ngo 1-0 ngoLwesihlanu, e-Adrar Stadium, e-Agadir, eMorocco.
IBafana edinga amaphuzu amathathu kowanamuhla, isendaweni yesibili kuGroup B ngamaphuzu amathathu emidlalweni emibili. Esicongweni kuhlezi i-The Pharaohs ngayisithupha futhi isivele izibekisele indawo kowe-Last 16 yize isazodlala owokugcina wesigaba samaqoqo ne-Angola khona namuhla ngo-6 ntambama.
“Into esiyikhulumayo nozakwethu njengamanje wukuthi kumele siye kwiZimbabwe siyolwela ukuwina. Kunzima kodwa sinethemba lokuthi sizokwazi ukuvuka sizithathe sesibhekene neZimbabwe, ngenxa yendlela esidlale ngayo ngesiwombe sesibili sibhekene ne-Egypt. Ngeke sililahle ithemba ngoba lisekhona ithuba lokuthi sedlulele emzuliswaneni olandelayo,” kusho uMbokazi.
Lesi siqongqwane somdlali wasemuva esiqatha sisematheni kulezi zinsuku kulandela ukugoba isihlabani se-Egypt neLiverpool, uMohamed Salah, emdlalweni wangoLwesihlanu kaGroup B.
“Kumele siqhubeke ngokuba yimbumba njengeqembu siqhubeke senze njengoba besenza ezinyangeni ezedlule ngoba kumele siwunqobe kumnyama kubomvu lo mdlalo esizowudlala.”
Lesi siqongqwane esidabuka KwaNibela, eHluhluwe, sisanda kusayiniswa yiChicago Fire yase-United States of America (USA). Siveze ukuthi sifunde lukhulu ngokumakana nezihlabani ezinjengoSalah no-Omar Marmoush ogijima kwiManchester City.
“Uma ngingena enkundleni angizikhathazi ngokuthi ngizobhekana namuphi umdlali. Okungisiza kakhulu wukuzethemba kwami enginakho ngaphakathi kimina njengomdlali. Khona ngifunda lukhulu ngokumakana nomgadli onamava njengoMoh Salah.
"Ngizosebenzisa lawo mava uma sengibhekene nabanye abadlali abasezingeni lakhe.”
Ukumaka ngobunsizwa kukaMbokazi kulindeleke kuphinde kubonakale kowanamuhla esebhekene nabagadli abayingozi be-The Warriors okubalwa kubona uKnowledge Musona noMacauley Bonne.