UDove ufuna aweCosafa asike iphethini kwiBafana

UMDLALI wasemuva kwiMozambique, u-Edmilson Dove, unesifiso sokubona amanye amazwe angaphansi kwesifunda seCouncil of Southern Africa Football Associations (Cosafa) esika iphethini eqenjini lesizwe laseNingizimu Afrika, iBafana Bafana, ngokuzibekisela indawo kwiNdebe yoMhlaba ka-2026. 

UDove ozakhele igama emaqenjini ePremier Soccer League (PSL) okubalwa kuwo iCape Town City neKaizer Chiefs, useqenjini leMozambique eliyibambe kwi-Africa Cup of Nations (Afcon) eqhubekayo eMorocco. 

I-The Mambas eku-Group FC neCameroon, Gabon ne-Ivory Coast, iphakathi kwamaqembu esizwe ayisikhombisa angaphansi kweCosafa, ayibambe kwi-Afcon yanonyaka. Leli qembu eliqeqeshwa nguChuquiono Conde liwine umdlalo walo wokuqala kwi-Afcon emlandweni ngokuguqisa iGabon ngo 3-2 izolo, e-Adrar Stadium. 

IBafana ebuyiselwe ebholeni lamazwe omhlaba ngo-1992, yilona kuphela izwe elingaphansi kweCosafa eselike lazibekisela indawo kwiNdebe yoMhlaba, njengoba selikwenze amahlandla amathathu lokho ngo-1998, 2002 no-2026.

Leli qembu eliqeqeshwa uHugo Broos, lizobe liyibambe kwiNdebe yoMhlaba ezodlalelwa eCanada, USA naseMexico ngo-2026. 

“Liyakhula ibhola lase-Afrika. Akusekho ukuzenzela nje kalula kwamazwe athile njengoba kwakwenzeka phambilini futhi ngijabule ngeNingizimu Afrika (Bafana Bafana), ikakhulukazi njengoba ngiyithatha njengekhaya lami lesibili. 

"Ngakho kuyangijabulisa ukuyibona idlondlobala. Lokho kuyinselelo yokuthi nathi njengamanye amaqembu esizwe ase-Afrika eseningizimu senze kangcono njengayo, nathi ngelinye ilanga sikwazi ukuya kwiNdebe yoMhlaba,” kusho uDove. 

IMozambique, Angola, Malawi, Zimbabwe, Angola, Botswana, neComoros, ukubala ambalwa, ngamanye amazwe angaphansi kweCosafa angakaze enze okuncomekayo kwi-Afcon. 

Ngemuva kweminyaka embalwa ibuyele ebholeni lamazwe omhlaba, iBafana yanqoba  i-Afcon ngo-1996, ngo-1998 yafinyelela kowamanqamu, ngo-2000 yathatha isithathu, yenza esifanayo nango-2023 e-Ivory Coast.

Ngakolunye uhlangothi, iChipolopolo yafinyelela kowamanqamu e-Afcon ngo-1974 idlala okokuqala kulo mqhudelwano, yafinyelela kowamanqamu ngo-1994, yadla isicoco ngo-2012.

Lokhu kwenza iBafana neChipolopolo, kube yiwona mazwe ayithemba leCosafa nakwi-Afcon yanonyaka.

IChipolopolo ekuGroup A neMorocco, Mali neComoros, ngemuva kokudlala ngokulingana ngo 1-1 no 0-0 neMali neComoros ngokwehlukana, izolwela ukudlulela kowe-Last 16 ngomdlalo wokugcina wesigaba samaqoqo neMorocco namuhla ngo-9 ebusuku ePrince Moulay Abdellah Stadium.