ICity isivale ngoBadela isikhala sikaHunt
USINETHEMBA Badela okunguyena osethathe izintambo zokuqeqesha kwiDurban City kulandela ukuxosha kwayo uGavin Hunt ekuqaleni kukaDisemba
Image: BACKPAGEPIX
IDURBAN City iqede ukuqagela ngesikhala somqeqeshi iqasha uSinethemba Badela ozongena endaweni kaGaqvin Hunt okhonjwe indlela ekuqaleni kukaDisemba.
UBadela (35) umenyezelwe njengomqeqeshi omusha weCity ngoLwesihlanu ngemuva kwamasonto okuqagela ngozovala isikhala sikaHunt.
Lo mqeqeshi odabuka eSterkpruit, e-Eastern Cape, owaqeqesha eqenjini leMamelodi elidlala kwiDStv Diski Challenge, nakwiWydad Casablanca yaseMorocco eyiphini likaRhulani Mokwena, uhlukane neChippa United ngo-Agasti.
UHunt uhlukane neCity emasontweni adlule, abaphathi baleli qembu baqinisekisa ukuthi bazosebenzisa ikhefu le-Africa Cup of Nations (Afcon) ukuthugatha umqeqeshi omusha.
“Siyathokoza ukwamukela umqeqeshi uBadela kwiDurban City. Ungumqeqeshi osemncane ohlezi elangazelele ukuphumelela nonomlando ekusebenzeni nabadlali abasebancane.
Sikholwa wukuthi ungumqeqeshi okulungele ukuhola iqembu ngempumelelo,” kusho usihlalo weCity, uFarook Kadodia, esitatimendeni esithunyelelwe abezindaba.
Ukuqokwa kukaBadela kulandele ukubuyiswa kuka-Ernst Middendorp esikhundleni sokuba ngusomaqhinga, nokuqokwa kuka-aAshraf Hendricks kwesokuba ngumqeqeshi weqembu leDiski Challenge
UHendricks uvale isikhala sikaDaine Klate ohlukane naleli qembu emasontweni amabili edlule.
UPitso Dladla obeyiphini likaHunt, usazoqhubeka nokuba yingxenye yethimba labaqeqeshi njengoba ezoba yiphini likaBadela ozoqala umsebenzi ngoDisemba 27 okuwusuku leli qembu elizoqala ngalo ukuzilolonga.
ICitizens eqede umzuliswano wokuqala wesizini yeBetway Premiership, isendaweni yesikhombisa kwi-log, izoqala umzuliswano wesibili ngemuva kwekhefu le-Afcon ngomdlalo wasekhaya nePolokwane City eChatsworth Stadium, eThekwini, ngoJanuwari 23.